VOV4.K’ho - Bè Anih jơnau đơs Việt Nam neh yal, tơnơ̆ 12 nam kơ̆p gơn, làng bol kis tàm tiah tơnao dà Krông Păc thượng neh sơn đờm ntrờn rê kis tàm ƀòn pa. Ală cấp, gơnoar atbồ gam tơrgùm ring niam rài kis ai làng bol in.

                   Tiah lơh ƀòn ơm kis pa ring niam mờ geh tơl bơta niam drơng làng bol in

                     Xã Cư̆ Elang gam tơrgùm dong kờl làng bol lơh wơl hìu tàm ƀòn ơm kis pa

Jăt mờ rơndăp broă, rơlao 700 hìu mờ mờr 4 rơbô nă làng bol kis tàm 3 ƀòn 9, 10 mờ 11, xã Cư̆ San, kơnhoàl Mdrăk geh ntrờn tus ƀòn ơm kis pa sồ 1 gơwèt xã Cư̆ Elang mờ ƀòn ơm kis pa sồ 2 gơwèt xã Cư̆ Bông, kơnhoàl Ea Kar nàng ai ù tiah lơh bơtơ̆t rơbòng dà 4 rơbô 400 tơmàn đong Krông Păc thượng in. Tus tŭ do, mờ broă lam sồr bơh ală cấp, gơnoar atbồ xã mờ broă lơh mùl màl, ală hìu làng bol ntrờn neh geh gàr niam rài kis niam rơlao mờ tàm ƀòn ơm kis lài do, khà hìu làng bol dan cih măt ntrờn gơguh tus mờr 200 hìu.

UBND kơnhoàl Mdrăk pà gĭt, kơnhoàl gam pơn jăt tai hòi jà mpồl cau, geh dong kờl làng bol ntrờn, mờ lam sồr ndang nàng ai geh nùs nhơm ring bal, mờ lơh ngan gờñ lơh gơs kơnòl tus tàm ƀòn ơm kis pa bơh tiah tơnao dà Krông Păc thượng.

Cau mblàng Ndong Brawl