VOV4.K’ho- Bè Anih jơnau đơs Việt Nam neh yal, tơnơ̆ mờ 12 nam kơ̆p gơn, làng bol kis tàm tiah tơnao dà Krông Păc thượng sơn đờm geh ntrờn tus tàm ƀòn ơm kis pa. Ală cấp, gơnoar atbồ gam tơrgùm lơh ring niam rài kis ai làng bol in.

Hìu nhă mò Ma Thị Sinh, kis tàm thôn 9, xã Cư̆ San, kơnhoàl Mdrăk là dùl tàm khà ală hìu sơnrờp ngan tàm tiah tơnao dà bơh broă lơh bơtơ̆t rơbòng dà Krông Păc thượng geh ntrờn tus tàm ƀòn ơm kis pa sồ 1, xã Cư̆ Ea Lang, kơnhoàl Ea Kar.

 Xã Cŭ Ea Lang gam tơrgùm dong kờl làng bol tàm ƀòn ơm kis pa ring niam rài kis

Tơnơ̆ mờ rơlao 1 poh, hìu nhă mò gam geh gơnoar atbồ tàm do dong kờl phan bơna kung bè cau lơh broă nàng lơh gơs hìu ñjrong chi, kơlĭk cang mờ găc. Hìu geh lơh tàm bă ù ơnàng, rềp mờ anih lơh broă xã, geh gùng bê tông, dà măi neh lơh tus tơn. 3 nă kòn mò Sinh gam bơsram cấp 1 mờ mẫu giáo kung neh sơn đờm mŭt bơsram tàm hìu bơsram pa, mìng ngài mờ hìu ờ hềt tus 500 thơ̆k. Rài kis pa neh geh ƀuơn niam ngan: “Ală wa kis tàm xã den sền gròi ngan, dong kờl hìu nhă añ lơh hìu, tìm sơlo, tùng, tui phan tus. Xã sền gròi bè hơ̆ den niam ngan. Hìu añ geh 5 sào sre, 5 sào mìr, di gơlan tơnơ̆ do añ pal lơh ngan tàm broă lơh sa”.

Ồng Trần Văn Thanh, Chủ tịch UBND xã Cư̆ Elang, kơnhoàl Ea Kar pà gĭt, kờp tus lồi nhai 3, neh geh rơlao 20 hìu ntrờn tus tàm ƀòn ơm kis pa sồ 1 gơwèt xã dê. Tài neh geh broă mờng chài tàm broă dong kờl làng bol ntrờn ơm kis tàm ƀòn pa, den tàng mpồl cau lơh broă tàm xã geh pơgồp bal niam, tam pà bal broă lơh loh làng. Xã gàr niam ală hìu làng bol tus ơm kis tàm ƀòn pa, ndrờm geh dong kờl uă ngan nàng gờñ ring niam rài kis. Gơwèt mờ ală hìu neh ntrờn tus ƀòn ơm kis pa, xã neh ai tơl hìu 1 sào ù lơh hìu ơm, 5 sào ù lơh sre mờ 5 sào ù lơh mìr, di jăt mờ gùng dà broă lơh bơh càr neh geh ai.

Tiah lơh ƀòn ơm kis pa ring niam, di pal tơl niam mờ bơta kờñ tàm rài kis làng bol

Broă lơh sa ƀuơn ngan ai làng bol in tŭ bơtơ̆t tơnao dơng dà Ea Rơ̆t, do là dùl broă lơh bal tàm rơndăp broă lơh bơtơ̆t dơng dà Krông Păc thượng dê, geh tơn tềng gah ƀòn ơm kis pa, ai dà tuh phan tam in tơl niam. Tàm tŭ broă lơh hìu bơsram bơh mẫu giaó tus mờ cấp 2 geh tơn rềp tềng ƀòn ơm kis pa sơl. Do là ală bơta ƀuơn ngan nàng làng bol ring niam rài kis: “Xã neh ai do là kơnòl chính trị kuơ màng ngan. Bè rơndăp broă lài ngan den xã kung neh ai mpồl cau nàng lơh bè lơi tŭ làng bol bơh đah ne tus den tơl niam bè rài kis, bè bơta lơngăp lơngai ờ do ờ dă, tơnơ̆ mờ hơ̆ là broă lơh sa”.

Jăt rơndăp broă, rơlao 700 hìu làng bol mờ mờr 4 rơbô nă cau tàm 3 thôn 9, 10 mờ 11, xã Cư̆ San, kơnhoàl Mdrăk geh ntrờn tus hờ ƀòn ơm kis pa sồ 1, gơwèt xã Cư̆ Elang mờ ƀòn ơm kis pa sồ 2 gơwèt xã Cư̆ Bông, kơnhoàl Ea Kar nàng drơng broă lơh bơtơ̆t rơbòng dà 4 rơbô 400 tơmàn đong Krông Păc thượng in. Lài ngan, broă ring bal bơh làng bol ờ hềt uă, den tàng mìng geh 44 hìu dan cih măt ntrờn. Tus tŭ do, mờ broă lam sồr bơh ală cấp, gơnoar atbồ tàm xã mờ broă lơh mùl màl bơh ală hìu làng bol ntrờn geh gàr niam rài kis rơlao mờ tàm ƀòn yau, khà hìu dan cih măt ntrờn neh gơguh mờr 200 hìu.

Ồng Nguyễn Đức Thảo, Phó Chủ tịch UBND kơnhoàl Mdrăk pà gĭt, kơnhoàl gam pơn jăt tai hòi jà mpồl cau, dong kờl ndang làng bol ntrờn, mờ lam sồr ndang nàng ai geh nùs nhơm ring bal, mờ lơh ngan gờñ lơh gơs kơnòl ntrờn ơm kis bơh tàm tơnao dà Krông Păc thượng: “Tàm tơngai tus, kơnhoàl geh pơn jăt tai chồl mhar broă tơm ntrờn ù tiah, lam sồr làng bol ntrờn tus tàm ƀòn ơm kis pa. Bơh broă ntrờn den ală hìu làng bol ndrờm ring bal nàng rê ơm kis tàm ƀòn pa mờ càr, kơnhoàl neh ai”.

Cau cih Công Bắc-Cau mblàng Ndong Brawl