VOV4.K’ho- Rlau 1 rơbô 800 nă kơnòm bơsram kấp bàr tàm Dak Lak pa tus bal pơrlòng sac rơwah mut bơsram ơdŭ 10, nam bơsram 2021-2022 bơh 2 hìu bơsram krơi is: Hìu bơsram kấp pe Chuyên Nguyễn Du mờ Hìu bơsram Trung học Phổ thông Dân tộc nội trú Nơ Trang Lơng.

Pơgru sền gròi jơnau yal bơh kơnòm bơsram tus bal pơrlòng

Dơ̆ sac rơwah kơnòm bơsram mut bơsram ơdŭ 10 nam do tàm Dak Lak mìng geh 2 hìu bơsram bơyai lơh pơrlòng sac rơwah, hơ̆ là Hìu bơsram kấp pe Chuyên Nguyễn Du, ƀòn dờng Buôn Ma Thuột, mờ Hìu bơsram Trung học Phổ thông dân tộc nội trú Nơ Trang Lơng. Tàm khà 1 rơbô 839 nă kơnòm bơsram tus bal dan cih mat pơrlòng, 2 hìu bơsram mìng geh jơnau kờñ rwah 550 nă kơnòm bơsram. Bơdìh mờ 2 hìu bơsram geh gơnoar pơrlòng sac rơwah, nam do, ală hìu bơsram Trung học Phổ thông ndai tàm Dak Lak ndrờm bơyai lơh sac rơwah. Ală hìu bơsram kấp pe, Hìu bơsram phổ thông ală kấp bơdìh dà lơgar, Hìu bơsram Phổ thông Dân tộc Nội trú Tây Nguyên mờ Hìu bơsram Trung học Phổ thông Thực hành Cao Nguyên, geh lơh gùng dà sac rơwah kơnòm bơsram is, jat tàm bơnàng jă Broă rơndap lơh sac rơwah kơnòm bơsram neh geh UBND càr Dak Lak kĭ ring bal.

Cau mblàng K’Hạnh