VOV4.K’ho - Tŭ do, drà kă bro phan drơng satềp Ñâm Zần nam 2022 tàm càr Dăk Lăk neh sơn đờm geh uă. Phan kă bro geh tăc uă bơta, uă bè bơta geh, khà phan, bơta niam, geh bal uă broă tơmù khà priă nàng di tŭ di pal mờ jơnau kờñ cau ngui sa dê.

Gam di pơgăp 1 nhai tai là tus satềp Ñâm Zần nam 2022, mơya lŏ Huỳnh Thị Hương, kis tàm sơnah ƀòn Thành Nhất, ƀòn dờng Buôn Ma Thuột neh rơcang tus ờ uă siêu thị tàm ƀòn dờng nàng jòi git bè rơwah ală bơta phan geh kuơ.

                                 Uă cau tàm ƀòn dờng Buôn Ma Thuột neh lòt blơi phan satềp

Jăt lŏ Hương đơs, blơi tàm tơngai do den gŏ khà priă di pal, bơta niam phan geh lơh di pal. “Đơs ngan den satềp cau lơi kung kờñ blơi dà lơngồt, bañ, kèo, mứt, bièr, ơlăk mờng ngui sa mơ. Gŏ phan geh tăc kung uă bơta, ràng tơlik niam măt kung ƀuơn sền, khà priă den gŏ kung di pal”.

Sền tàm ală drà bè ờs mờ hìu tăc phan tàm sơnah ƀòn Thành Nhất mờ Thàng Công, ƀòn dờng Buôn Ma Thuột pà gŏ, ală bơta phan ngui sa drơng tàm broă geh kuơ tàm dơ̆ satềp gam tơnguh khà priă tăc. Mơya, broă kờñ blơi bơh làng bol dê gam ờ hềt gơguh. Lŏ Nguyễn Thị Trúc Phương, atbồ hìu tăc phan Ngọc Khánh 2, sơnah ƀòn Thành Nhất, ƀòn dờng Buôn Ma Thuột pà git, tài gơrềng bơh kòp gơtờp den tàng nam do lŏ ờ khin blơi uă bơta phan kă bro: “Khà phan nam do kờp dŭ geh blơi ờ uă rơlao pơn drờm mờ ală nam tài bơta kòp gơtờp bè do den khà phan blơi geh ờ uă. Khà priă den nam do phan kă bro gơguh rơlao mờ ală nam, jăt mờ tơl bơta phan, geh bơta phan ring niam khà priă, geh bơta phan geh khà priă pa”.

                                   Ală siêu thị ndrờm geh lời is tiah nàng ràng tăc phan satềp

Sơlơ̆u wơl mờ ală hìu tăc phan mờ drà kă bro phan ờs mờng, tàm ală siêu thị dờng bè Go, Co.op Mart, Vin Mart, MM Mega Markit..., ală bơta phan drơng satềp bè ƀañ, kèo, ơlăk, bièr, dà lơngồt, mứt geh uă bơta. Ală siêu thị ndrờm geh tiah niam ngan nàng ràng tăc phan satềp. Khà priă ală bơta phan tàm siêu thị kung gam tàm khà ring niam. Bi Bùi Văn Quân, kwang atbồ Siêu thị Go Buôn Ma Thuột pà git: “Khà phan gơguh 14% khà phan prăp gàr pơn drờm mờ nam 2021, kờp dŭ bơta pràn blơi jăt siêu thị sền den mìng gơguh bơh 5 tus 10% mơ, gam tus tŭ do den bơta pràn blơi ờ hềt gơguh. Khà priă den tŭ do gam geh sùm ndrờm mờ nam lài, di lah drà kă bro geh tam gơl gơrềng tus mờ broă pơn diang ha là lơh sa bơh ală gah ai geh phan den tŭ hơ̆ geh lơh wơl tơnơ̆, mơya tus tŭ do den siêu thị gam lơh ngan geh sùm khà priă ndrờm mờ nam lài”.

Tài kòp Kovid-19 gam gơtìp kal ke, bal mờ broă rơcang geh phan nàng tăc tơn tàm tiah do, ală siêu thị kung gam chồl pràn ală tiah tăc phan online, jào phan tus tơn tàm hìu drơng broă kờñ blơi bơh làng bol in. Ồng Nguyễn Ngọc Hiệp, Atbồ tàm MM Mega Markit Buôn Ma Thuột yal: “Tŭ do siêu thị bol añ kung bơyai lơh uă gah tăc phan, tàm hơ̆ uă ngan là tơnguh bơtàu pràn gah tăc phan online, jào phan tus tơn tàm hìu cau blơi phan in, pơn drờm mờ nam lài, gah tăc phan do gơguh di pơgăp 300% khà cau năc kung bè khà priă geh bơh broă tăc phan”.

Nàng ring niam drà kă bro lồi nam, di pal mờ broă kờñ blơi phan bơh làng bol dê di tàm satềp Ñâm Zần nam 2022, tŭ do neh geh 10 mpồl lơh sa kă bro dờng tàm càr Dăk Lăk hơ geh prăp phan geh kuơ mờ kờp jơh geh rơlao 271 tơmàn đong. Ală bơta phan ring niam khà priă mìng geh phe, poăc sur, poăc iar, ơda, tăp iar, ơda, dà tơngi, ƀòk ngòt mờ ală phan sa neh geh lơh lài, biăp, kơnuh, plai chi, ƀañ, kèo, mư̆t. tơngai lơh jăt ring niam khà priă tus rơlao 2 nhai, bơh ngai 15/12/2021 tus ngai 28/2/2022.

Cau cih Nam Trang-Cau mblàng Ndong Brawl