VOV4.K’ho- Ală Sở, gah broă lơh, gơnoar atbồ ală tiah gàr tơl ală bơta kuơmàng nàng dơ̆ pơrlòng jơh bơsram kấp 3 tàm Dak Lak geh lơh ờdo ờdă, jơh nùs, song sơpă di mờ quy chế mờ lơh gơlik bơta ƀuơn ngan rlau jơh ai cau pơrlòng in, ngan là tàm tơngai kòp Covid-19 gam gơlik geh kal ke, do là tơngume geh đơs nền tàm dơ̆ pơrjum Mpồl đơng lam pơrlòng jơh bơsram kấp 3 nam 2021 càr Dak Lak geh lơh mho ngai 02/6. Dơ̆ pơrlòng jơh bơsram kấp 3 nam 2021 tàm Dak Lak geh rlau 19 rbô 800 nă cau cih mat tus bal pơrlòng tàm 32 anih pơrlòng, mờ rlau 830 cơldŭ pơrlòng.

Tus tŭ do, gùt càr đal git geh 2 nă cau F1 mờ 39 nă cau F2, jơh ală oh ndrờm ơm tàm kơnhoàl Ea Hleo. Tềng đap bơta khà cau tus bal pơrlòng gal bal mờ kòp Covid-19 geh ală broă gơlik geh kal ke, Mpồl đơng lam pơrlòng neh sồr Sở Giáo dục mờ Đào tạo pơgồp bal mờ ală mpồl lơh broă geh gơ rềng, gơnoar atbồ ală tiah bơyai lơh pơrlòng ờdo ờdă, jơh nùs, geh cồng nha tàm jơh ală bơnah broă bơh broă cih mat tus bal pơrlòng tus sền sơ wì dờp jơh bơsram kấp 3.

Cau mblàng K’Duẩn