VOV4.K’ho- Ală broă gơrềng bơh kòp Covid-19 neh lơh aniai uă ngan tus mờ broă lơh sa mpồl bơtiàn tàm càr Dăk Lăk. Mơya mờ broă lơh ngan bơh Đảng bộ, gơnoar atbồ, làng bol, càr Dăk Lăk neh lơh geh ală cồng nha niam tàm broă rơcang sơndră mờ kòp gơtờp. ală tiah tàm càr neh rơhời tam gơl tus mờ bơta gơdờp nàng ring niam, brồ guh lơh sa, càr niam rài kis lơh sa mpồl bơtiàn tàm bơta pa.

Là 1 tàm ală xã geh 22 nă cau gơtờp mờ kòp Covid-19, ƀòn 6 mờ ƀòn 7 xã Vụ Bổn, kơnhoàl Krông Păc tàm kòp gơtờp dơ̆ 4, mơya mờ nùs nhơm lơh jăt jơnau đơng lam bơh Thủ tướng Chính phủ: “Tơl xã, sơnah ƀòn là 1 pôs tam dră, tơl mpồl, tàm hơ̆ kuơ màng là mpồl rơcang sơndră mờ kòp Covid mpồl bơtiàn là anih lài ngan”, Đảng bộ, gơnoar atbồ bal mờ làng bol xã Vụ Bổn neh mhar gròi sền kòp, kơrian geh kòp gơtờp, ai tơl bơta niam lơh sa mpồl bơtiàn tàm xã in pơn jăt tai tơnguh bơtàu.

Làng bol kis tàm càr Dăk Lăk gam lơh ngan tàm broă lơh sa, mờ lơh jăt ală kơrnoăt tàm broă rơcang sơndră mờ kòp gơtờp

Ồng Lê Viết Nhượng, Bí thư Đảng ủy, Kuang atbồ đơng lam broă rơcang sơndră mờ kòp Covid-19 xã Vụ Bổn, kơnhoàl Krông Păc pà git: “Xã neh ai broă rơcang sơndră mờ kòp là broă ai lài ngan. Nùs nhơm bè broă đơng lam bè jơnau kờñ dơ̆ lĕ bal là rơcang sơndră mờ kòp, mơya kung dong kờl lơh sa tơnguh bơtàu. Tàm tơngai pa do, lơh jăt broă đơng lam bơh Thủ tướng den xã neh lơh jăt tơl Mpồl đơng lam mờ crơng gơs pa Anih đơng lam rơcang sơndră mờ kòp gơtờp mờ neh bơtơl gùng dà broă rơcang sơndră mờ kòp tàm bơta pa. Tàm hơ̆ geh broă lơh jăt jơnau kờñ dơ̆ lĕ bal, ai tơl bơta niam nàng làng bol in lơh sa”.

Tàm kounhoàl Ea Hleo, càr Dăk Lăk neh gŏ uă cau geh gŏ mờ virus Sars CoV-2, tàm hơ̆ geh uă cau geh gŏ tàm mpồl bơtiàn lơh gơrềng tus mờ broă lơh sa, kă bro, bơcri priă mờ rài kis làng bol. Bơh nùs nhơm ờ sŭk, kal ke lài ngan, tus tŭ do mờ broă tus bal pràn bơh ală mpồl lơh broă chính trị bal mờ broă lơh ngan bơh làng bol, kơnhoàl Ea Hleo neh rơcang sền gròi kòp gơtờp, mờ lơh geh cồng nha uă jơnau kờñ tơnguh bơtàu broă lơh sa mpồl bơtiàn 9 nhai tàm nam 2021. Tus tŭ do, kơnhoàl neh hòi jà geh 21 rơndăp broă bơcri priă tàm kơnhoàl mờ kờp jơh geh mờr 2 rơbô 500 tơmàn đong. Den tàng, bal mờ broă gàr niam ờ do ờ dă kòp gơtờp, den kơnòl gàr ring niam chính trị, tơnguh bơtàu broă lơh sa gam geh jơh ală mpồl lơh broă chính trị, làng bol mờ mpồl lơh sa kă bro sền gròi ngan. Ồng Vũ Đình Tân, Kuang atbồ Công ty Cổ phần ồs đèng càl Trung Nam càr Dăk Lăk 1, do là mpồl lơh sa geh rơndăp broă gam geh lơh tàm kơnhoàl Ea Hleo pà git: “Tŭ do, rơndăp broă lơh gam tàm tơngai lơh ngan bơh broă pơn diang mờ crăp. Gơwèt mờ broă bơ̆t bơtàu den bè đah công ty neh rơcang lơh jăt, tàm hơ̆ kuơ màng ngan là ală tiah tờm den neh geh tuh bê tông mờ crăp. Mìng geh broă là tŭ do, tềng đăp mờ bơta kòp gơtờp bè do den đah công ty neh rơcang cri bơyai mờ ală cau jăk chài lơgar bơdìh lơh ală sră nggal tus tàm lơgar Việt Nam gờñ mờ lơh jăt broă tam cah is mpồl bơtiàn, gàr niam ală kơrnoăt bơh Chính phủ ai. Bal mờ hơ̆, den gơwèt mờ kuang bàng, cau lơh broă bơh công ty tàm tiah lơh broă den jơh ală cau neh lơh jăt là tus tàm tiah lơh broă là rê tàm anih ơm bơh să tờm mờ pal geh lơh jăt broă yal broă lơh sơnơm…”.

Jăt ồng Phạm Minh Tấn, Phó Bí thư Thường trực Tỉnh ủy Dăk Lăk yal: kòp Covid-19 gơtìp neh lơh gơrềng ờ niam uă ngan tus mờ rài kis bơh làng bol kung bè broă tơnguh bơtàu bal gùt mpồl bơtiàn dê, tàm hơ̆ geh càr Dăk Lăk. Mơya, mờ broă lơh ngan bơh gùt Đảng, gùt làng bol, tus tŭ do bơta kòp gơtờp tàm càr neh, gam geh sền gròi mờ kơrian. Ală jơnau kờñ bè lơh sa mpồl bơtiàn 9 nhai pa do kung gam gơguh pơn drờm mờ tŭ do nam 2020. Gơguh lơh sa càr dê 9 nhai geh 5,28%. Kờp jơh khà kes priă dà lơgar tàm càr kờp dŭ geh 5 rơbô 500 tơmàn đong, ndrờm mờ 74,5%, rơndăp broă kờp dŭ HĐND càr jào, gơguh 3% pơn drờm mờ tŭ do nam lài. Mơya, nàng lơh geh cồng nha ală kơnòl tàm nam 2021 di jăt mờ Nghị quyết bơh Tỉng ủy neh ai, tàm tongai tus, ală cấp ủy, gơnoar atbồ, mpồl lơh broă; ală anih lơh broă, mpồl lơh broă, ală kơnhoàl, thị xã, ƀòn dờng tàm càr gam pơn jăt tai lơh jăt broă lơh mùl màl, ai geh ală broă lơh, bơyai lơh jăt ndrờm bal, geh cồng nha mờ nùs nhơm lơh ngan uă, pơgồp broă rơcang sơndră mờ kòp gơtờp bal mờ broă tơnguh bơtàu lơh sa mpồl bơtiàn, gàr niam bơta lơngăp lơngai dà lơgar. Ồng Phạm Minh Tấn, Phó Bí thư Thường trực Tỉnh ủy Dăk Lăk đơs tờm: “Kòp Covid-19 lơh gơrềng mờr 2 nam do neh lơh ờ niam uă ngan tus mờ broă tơnguh bơtàu lơh sa mpồl bơtiàn, mơya he kung sùm ai lài ngan gơnoar kuơ, broă lơh di pal bơh làng bol dê mờ sùm lơh jăt di mờ broă đơng lam bơh Dà lơgar, bơh Chính phủ là lơh jăt jơnau kờñ “dơ̆ lĕ”, là tơrgùm tơnguh bơtàu broă lơh sa mpồl bơtiàn, mờ gàr niam broă rơcang sơndră mờ kòp Covid-19 mờ ală bơta broă lơh sa kă bro ndai. Ờ gơtùi ờ sền gròi, sền ờ sơ̆p, ờ rơcang lài nàng lơh bè lơi ai geh bơta niam ngan nàng he tơrgùm ală bơta pràn nàng ring niam chính trị, tơnguh bơtàu broă lơh sa mpồl bơtiàn, gàr niam bơta lơngăp lơngai dà lơgar, bơ̆t bơtàu mpồl lơh broă chính trị tàm gùt càr”.

Mờ broă lơh ngan lơh geh cồng nha “jơnau kờñ  dơ̆ lĕ” bè broă rơcang sơndră mờ kòp Covid-19 geh cồng nha mờ lơh gơs ală jơnau kờñ bè tơnguh bơtàu broă lơh sa mpồl bơtiàn tàm nam 2021, Đảng bộ, gơnoar atbồ, làng bol ală jơi bơtiàn kòn cau kis tàm càr Dăk Lăk gam rơcang rơhời tam gơl nùs nhơm jăt mờ Nghị quyết neh ai tơlik ing “Gơdờp ờ do ờ dă, ndrờm bal, gròi sền geh cồng nha kòp Covid-19”.

Cau cih Hương Lý-Cau mblàng Ndong Brawl