VOV4.K’ho- Tơngai lài, càr Dăk Lăk neh gĭt geh 82 dơ̆ hòi điện thoại lùp dồs priă đèng bơh làng bol dê, halà lùp kờñ gĭt broă tung kơñau đèng...Broă sùm geh ală dơ̆ hòi điện thoaị lùp dồs priă đèng mờ pơhìn koh đèng lơh uă làng bol kơlôi rơcăng ngan. Anih lơh broă geh gơnoar tơngkah lài làng bol in pal rơcăng ngăc mờ ală dơ̆ hòi điện thoại đơs pơrlồm muh măt nàng pleh gơtìp cau pơrlồm.

Ồng Trần Văn Nho, hìu tàm gùng kòn 447, gùng Lê Duẩn, sơnah ƀòn Ea Tam, ƀòn dờng Buôn Ma Thuột, pà gĭt: Tàm nhai 6 pa do, ồng dờp geh dơ̆ hòi điện thoại bơh sồ krơi sồr tơm priă đèng rlau 370 rbô đong. Tài bơh neh tơm priă đèng den tàng ồng gơlơh pin, mờ hòi tus sồ điện thoại gah ồs đèng dê nàng lùp den gĭt hơ̆ là dùl broă lơh pơrlồm. Ồng Trần Văn Nho, đơs: Khi đơs là hìu bơnhă añ gam dồs priă đèng mờ sồr tơm lài mờ tŭ 4 jiơ mho nàng pleh gơtìp koh đèng. Añ lùp là tŭ do tơm bè lơi den khi đơs là tơnơ̆ mờ tŭ dờp geh jơnau cih yal tàm điện thoại den pờ jăt gùng link mờ yal mã năc ngui đèng tơnơ̆ hơ̆ den geh bơta bơto pơlam tơm priă. Añ gŏ gơlơh pin geh jơnau lơi hơ̆ den tàng tơn chơ̆t măy. Tơnơ̆ hơ̆ añ hòi mờ sồ điện thoại gah ồs đèng dê jăt sồ 19001909 nàng yal, den ùr iăt sồ điện thoại gah ồs đèng dê đơs añ in gĭt hơ̆ là dơ̆ hòi pơrlồm.

Kung dờp geh dơ̆ hòi điện thoaị sồr tơm priă đèng ndrờm bè hơ̆ sơl, ồng Trương Văn Sơn ơm tàm thôn 11, xã Hoà Phú, ƀòn dờng Buôn Ma Thuột, yal: Hìu bơnhă añ đơs bal là kung geh sơl nhai ờ hềt thàn tơm priă đèng, den kung geh sồ điện thoại hòi tus sồr tơm mờ sồr lòt tus công ty nàng tơm priă đèng. Tơnơ̆ hơ̆ hìu bơnhă añ neh tơm mơya gơtìp hòi điện thoại lùp dồs priă đèng tai, mơya añ gŏ sồ điện thoại hơ̆ gơlơh krơi ngan. Hìu bơnhă kung đơs sơl mờ công ty là neh tơm priă đèng rao mờ ñchi gơlơh hòi lùp điện thoại lơh pơrlồm bè hơ̆ tai hah.

Làng bol pal rơcăng ngac tŭ dờp geh dơ̆ hòi điện thoại bơh ală sồ điện thoại krơi dê

Jăt jơnau yal bơh Anih tờm sền gròi cau ngui đèng gơwèt Gah ồs đèng tiah tàm gùl lơgar dê, bơh nhai 5 tus tŭ do, tàm càr Dăk Lăk neh geh 82 nă dơ̆ làng bol dờp geh dơ̆ hòi điện thoại bơh số krơi, đơs is là cau lơh broă gah ồs đèng sồr tơm priă đèng; halà cau bơh anih lơh broă kuang àng dê gam lùp khàu jơnau yal cau ngui đèng tung kơñau đèng...Cau hòi điện thoại sồr tơm priă halà yal tơn jơnau dilah ờ den geh gơtìp koh đèng. Bàr pe nă cau gam gơtìp bơto pơlam cau ngui đèng lơh jăt ală broă pơlam lơh jăt gùng link pơyua bơh jơnau cih yal tàm điện thoại.

Bơh lùp, Công ty Ồs đèng Dăk Lăk dê đơs nền, do ndrờm là ală dơ̆ hòi đơs pơrlồm lơm, tàm hơ̆ geh uă khà sồ sơnrờp bơh sồ điện thoại dê ờ gŏ di là tàm lơgar Việt Nam ờ. Ală dơ̆ hòi điện thoại do nàng kờñ pơrlồm cau ngui đèng lơm, tung kơñau jơnau yal tơngĭt nàng sa kơñau priă jền tàm tài khoản điện thoại, tài khoản ngân hàng...Bơto sồr làng bol pal rơcăng ngăc tŭ dờp geh ală dơ̆ hòi điện thoại nàng pleh gơtìp cau pơrlồm, ồng Hà Văn Chương- Phó Kuang ătbồ Công ty Ồs đèng Dăk Lăk, đơs loh: Công ty Ồs đèng Dăk Lăk bơto sồr jơh ală cau ngui đèng in, lài ngan là cau ngui đèng mìng tơm priă đèng bơh ală gah ngan ngồn halà ală mpồl lòt lùp ƀà bè neh lơh jăt tàm ală nhai lài. Dơ̆ bàr là năc ngui đèng pal kơrhia ngan tŭ yal tơngĭt jơnau bè muh mat rài kis să tờm he dê ai ală cau krơi in. Dơ̆ pe là ală jơnau yal bè drơng broă đèng den mìng dờp bơh ală gah lơh broă ngan ngồn bơh gah ồs đèng dê bơh lài tus tŭ do mờ ờ gŏ lơh bơh điện thoại; dilah kờñ geh dong kờl den năc ngui đèng gơtùi hòi điện thoại tus Anih tờm sền gròi năc ngui đèng sồ 19001909 nàng gah ồs đèng dong kờl.

Ală sồ điện thoại krơi

 Tơngai lài, broă lơh pơrlồm bơh điện thoại neh gơlik geh tàm uă tiah tàm gùt lơgar. Ală dơ̆ hòi điện thoại pơrlồm do geh lơh bơh sim tìs, halà bơh ală phần mềm lơh is. Do là broă lơh pơrlồm măy mok pa tŭ do mờ ờ hềt gơtùi bơsong kơryan jơh gơ. Den tàng bè hơ̆, làng bol pal tơnguh uă nùs nhơm rơcăng ngăc kơrhia ngan tềng đăp ală dơ̆ hòi điện thoại lùp dồs, sồr lùp jơnau yal tơngĭt..., ờ mìng is priă đèng lơm mờ geh bal ală priă sră blơi phan bơna kờñ pal geh ndai nàng pleh gơtìp cau sa kơñau priă jền.

Cau mblàng Lơ Mu K’Yến