VOV4.K’ho- Tềng đap bơta kòp Covid-19 gam gơlik geh kal ke, gah bơto bơsram càr Dak Lak neh geh ală rơndap broă nàng jun 10 nă kơnòm pơrlòng tàm càr tus Khánh Hòa pơrlòng jơh bơsram kấp 3 dơ̆ 2 nam 2021. Jat broă rơndap lơh bơh Bộ Giáo dục mờ Đào tạo dê, dơ̆ pơrlòng jơh bơsram kấp 3 dơ̆ 2 nam 2021 geh lơh tàm ngai 5 mờ ngai 6/8 tus do. Dak Lak geh 10 nă kơnòm pơrlòng dơ̆ 2 do (tàm hơ̆ geh 1 nă oh là cau F2, 9 nă oh tàm tiah tam cah is, wàng se ờ gơtùi tus bal pơrlòng dơ̆ 1).

Dơ̆ 2 do, ală kơnòm pơrlòng càr Dak Lak geh pơrlòng pơgồp bal tàm Mpồl duh broă pơrlòng càr Khánh Hòa. Sở Giáo dục mờ Đào tạo càr Dak Lak pà git, tơnơ̆ tŭ lơh broă mờ Sở Giáo dục mờ Đào tạo càr Khánh Hóa nàng dờp ală kơnòm pơrlòng, Sở neh geh rơndap broă rơcang lài rơndeh jun, rò, anih ơm, sàu sa ală oh lòt pơrlòng jơh bơsram kấp 3 dơ̆ 2 in nàng gàr ờdo ờdă, ngan là tŭ kòp bơtờp gam gơlik geh kal ke jơh bal tàm càr Dak Lak mờ Khánh Hòa.

Cau mblàng K’Duẩn