VOV4.K’ho – Tam pà bal kal ke bơh làng bol ƀòn dờng Hồ Chí Minh dê tŭ pal lơh jat jơnau sồr ơm yah ngài sơndră kòp bơtờp jat Jơnau sồr sồ 16 bơh Thủ tướng Chính phủ dê, ală “Rơndeh kờñ gơboh” bơh ală mpồl cau, cau dùl nă să tàm càr Dak Lak neh lòt gùng nàng dong kờl. Git nđờ jơt tấn phan sa neh mờ gam geh pơyua tus plai nùs bơh lơgar Việt Nam dê, bulah Dak Lak kung gam pal lơh ngan nàng kơryan kòp Covid-19.

Klo yal Hội Chữ thập đỏ ƀòn dờng Buôn Ma Thuột gam lơh bal mờ Mpồl cau ùr Kuang àng càr Dak Lak mờ ală cau geh nùs nhơm niam lam lơh “Rơndeh kờñ gơboh” nàng pơndiang biap, kơnuh, plai đo tus dong kờl làng bol ƀòn dờng Hồ Chí Minh tàm ală ngai lơh jat broă ơm yah ngài jơh gùt mpồl bơtiàn, bi Lê Thị Thanh Tâm, cau tờm hìu tac phan Lợi Tâm, ƀòn dờng Buôn Ma Thuột neh gơ jă gơ jal lùp gơp bơyô nàng lòt bal. Bi Tâm yal, sền Sài Gòn hàng bơnĕ nisơna gơ gơs ờ sô, lơbơn lơño tài bơh kòp bơtờp, bi gŏ plai nùs he gơ lơh ờ suk ngan, kờñ geh tam pà bal: “Sền gŏ ƀòn dờng Hồ Chí Minh gam gơtìp kal ke den tàng añ pơgồp bal mờ Hội Chữ thập đỏ nàng dong kờl làng bol ƀòn dờng Hồ Chí Minh nàng sơrlèt gan tơngai gơtìp kòp bơtờp lơh gơbàn kal ke do. Kơp kờñ là ƀòn dờng Hồ Chí Minh gờñ sơrlèt gan dơ̆ bơtờp kòp do nàng rê wơl rài kis bè ờs”.

Rơndeh pơndiang biap cèng nùs nhơm bơh cau Dak Lak dê mut tàm ƀòn dờng cèng sơnđan mat Bác Hồ

Bi Tống Thị Tươi ơm tàm sơnah ƀòn Tân Lợi, ƀòn dờng Buôn Ma Thuột- là cau tus bal jơh nùs ngan tàm broă hòi jà ală cau geh nùs nhơm niam lòt bal mờ ală “Rơndeh kờñ gơboh” tơrbŏ Dak Lak mờ ƀòn dờng Hồ Chí Minh pà git, jơh ală biap, kơnuh, plai đo geh tơrgùm pơyua tus ƀòn dờng Hồ Chí Minh in ndrờm geh mpồl kuang àng càr mờ ală cau geh nùs nhơm niam tus tàm suơn tam biap bơh ală tiah tam biap tàm Buôn Ma Thuột dê blơi rê. Biap pơyua tus tiah tờm gơbàn kòp in ờ mìng dong làng bol ƀòn dờng tơrmù ƀà bơta ờ ru mờ gam pơgồp bơnah pơndiang biap li la ngan tàm càr Dak Lak: “10 ngai lài den añ gŏ kòp bơtờp bè do den làng bol ờ gơtùi tac biap. Tơnơ̆ tŭ gŏ broă gơlik geh bơh kòp dê tàm ƀòn dờng Hồ Chí Minh kal ke den oh mi bol hi tàm bơyai bal mut tàm hơ̆ ờ mìng dong làng bol gơtùi tac biap mờ gam cèng khà biap do tus ală tiah gam kờñ mờ tàm tŭ do là ƀòn dờng Hồ Chí Minh gam lơh ngan sơndră kòp. Rơndeh do là rơndeh pơndiang dơ̆ 2 mờ bol hi rơcang geh tai rơndeh pơndiang dơ̆ 3”.

Git nđờ rbô nai tap kung geh pơyua tus tiah tờm gơbàn kòp in

Mò Nguyễn Thị Lý, Phó Chủ tịch Hội Chữ thập đỏ ƀòn dờng Buôn Ma Thuột pà git, tơnơ̆ tŭ Hội Chữ thập đỏ ƀòn dờng pơgồp bal mờ Mpồl cau ùr kuang àng càr Dak Lak lam lơh broă lơh “Rơndeh kờñ gơboh” wèt hờ tiah tờm gơbàn kòp, jơh bal 2 mpồl neh dờp geh bơta dong kờl uă ngan bơh ală cau geh nùs nhơm niam. Tus tŭ do, broă lơh “Rơndeh kờñ gơboh” neh pơndiang mờr 50 tấn biap, kơnuh, plai đo, git nđờ rbô nai tap mờ kơphe pơndiang mut tàm ƀòn dờng Hồ Chí Minh, mờ kờp jơh khà priă mờr 400 tơlak đông. Broă lơh gàr niam cau măi rơndeh in tàm tŭ pơndiang biap kung geh sền gròi, gàr niam ờdo ờdă rơcang sơndră kòp: “Nàng gàr niam ờdo ờdă ai cau măi rơndeh in lòt mờ tus tiah tờm gơbàn kòp den Hội Chữ thập đỏ ƀòn dờng pơgồp bal mờ Hìu sơnơm ƀòn dờng bơyai lơh xét nghiệm kòp mhar ai cau măi rơndeh in. Tơnơ̆ tŭ ală cau măi rơndeh lòt bơh ƀòn dờng Hồ Chí Minh rê den Hìu sơnơm pơn jat tai lơh xét nghiệm mhar ai ală cau măi rơndeh in nàng ală cau măi rơndeh iang nùs gơ rờm bal mờ rài kis bè ờs”.

Tàm ală ngai jơh gùt lơgar, ngan là ƀòn dờng Hồ Chí Minh gam pal lơh ngan sơndră kòp Covid-19, ală rơndeh pơndiang phan nùs nhơm bơh Dak Lak dê ờ mìng là bơta dong kờl phan bơna. Hơ̆ gam là nùs nhơm tam pà bal, là jơnau đơs dùl nùs pơgồp bal bơta pràn sơrlèt gan kal ke, kơryan kòp bơtờp.

Cau mblàng K’Duẩn