VOV4.K’ho- Mang ngai 30/5, ồng Nay Phi La, Kuang atbồ Sở Y tế càr Dak Lak yal, tàm tiah do pa sền gŏ tai 1 nă cau bơtờp mờ virus Sars CoV-2. Hơ̆ là cau ùr, ơm tàm thôn 7, xã Cư Mốt, kơnhoàl Ea H’Leo, càr Dak Lak. Cau do ơm bal tàm hìu ơm ơpah mờ cau kòp Covid-19 ơm tàm quận 12, ƀòn dờng Hồ Chí Minh. Bi do đì rơndeh pơn diang nac rê tàm thôn 7, xã Cư Mốt tŭ 6 jiơ drim ngai 26/05/2021. Bơh ngai 26 tus ngai 29/5 mờ neh ơm rềp, tơm bơh bơr mờ uă ngan cau tàm tiah do dê. Drim ngai 30/5 cau do neh geh jun tus tiah ai ơm yah ngài tơrgùm bal tàm Hìu bơsram Cao đẳng Công nghệ Tây Nguyên mờ geh ai mẫu xét nghiệm mờ cồng nha bơtờp mờ virus Sars CoV-2.

Ƀồm sơnơm lơh kloh khuẩn tàm hìu bơnhă cau kòp dê

Tàm mang 30/5 tơn, càr Dak Lak neh bơyai lơh pơrjum mhar nàng lam lơh ală broă lơh wàng se kơryan kòp tàm tiah cau do ơm kis mờ ai ơm yah ngài ală cau ơm rềp. Mơkung pơn jat tai  jòi gĭt tiah lòt rê bơh ală cau F1 mờ F2 dê. Ủy ban Nhân dân càr Dak Lak kung sồr ơm ing broă pơn điang năc mờ rơndeh ôtô jat gơl gùng tờm, rơndeh pơndiang năc jat sră pơrgon, rơndeh taxi, rơndeh nhơl chờ bơh Dak Lak lòt tus ală tiah: ƀòn dờng Hồ Chí Minh, càr Bắc Ninh, càr Bắc Giang mờ sơlơ̆u wơl kờp bơh 12 jiơ mang ngai 31/5/2021.

Cau mblàng K’Hạnh