VOV4.K’ho - Tơnơ̆ mờ ală cau F1 geh 3 dơ̆ xét nghiệm ờ gŏ mờ virus Sars Cov-2, rơlao 140 nă làng bol kis tàm ƀòn gơtìp kơrian kung ai cồng nha 2 dơ̆ xét nghiệm ờ gŏ mờ kòp, drim òr, (26/05) UBND càr Dak Lak neh tơlĭk kơrnoăt tơn jơh broă kơrian gơwèt mờ ƀòn ơm kis tềng gùng dềt 189/1, gùng Mai Hắc Đế, sơnah ƀòn Tân Thành, ƀòn dờng Buôn Ma Thuột, càr Dak Lak, do là ƀòn geh dờp 2 nă cau gơtìp kòp Covid-19.

                                     Làng bol kis tàm tiah wàng se geh dp sră neh jơh kơrian mờ kòp gơtờp

Mò Trần Thị Dinh, Phó Chủ tịch UBND sơnah ƀòn Tân Thành pà gĭt, tàm tơngai tam cah is ƀòn do, bal mờ broă ai mpồl kuang bàng sền gròi nàng gàr niam bơta lơngăp lơngai, ờ do ờ dă tàm broă sơndră mờ kòp gơtờp, gơnoar atbồ sơnah ƀòn neh hòi jà ală cau geh nùs nhơm niam dong kờl phan sa mờ phan ngui nàng gàr niam rài kis ai làng bol in.

Jăt mò Trần Thị Dinh yal, tàm tơngai tus, bŭ lah neh sơbì broă kơrian, sơnah ƀòn gam pơn jăt tai geh broă sền gròi bơta pràn kơl dang să jan ală cau kis tàm ƀòn do nàng di tŭ bơsong di lah geh bơta gơbàn.

Cau mblàng Ndong Brawl