VOV4.K’ho- Ală ngai do, ală bơta ờ suk tàm broă test mhar kòp Covid-19 mờ sră cơng tàng ờ bơtờp mờ kòp do ai làng bol in lòt rê gan ală tiah gròi sền kòp đah ală càr, neh lơh uă làng bol tàm càr Dăk Lăk gơ ơm tàm bơta bòl glar kal ke ngan. Khi pal lòt jòi lùp làm bă tiah nàng jòi anih lơh xét nghiệm, uă cau lơh ờ gơtùi lồi dŭt pal muăt jrùm wơl dô rê wơl. Rài kis mờ broă lơh pơn jăt mờ hơ̆ kung gơtìp gơrềng sơl.

Tă nhơm jòng tơnơ̆ tŭ lik bơh tiah yal mờ cau lơh sơnơm bơh Hìu sơnơm ƀòn dờrng Buôn Ma Thuột, càr Dăk Lăk dê, bi Trần Thị Tuyết ơm tàm kơnhoàl Lâm Hà, càr Lâm Đồng pà gĭt, ngai 05/7 bi bal mờ gơ̆p bơyô lòt rơndeh măy tus Gia Lai nàng còp cau quèng. Tŭ bi wơl rê wơl hờ càr Dăk Lăk nàng rê hờ Lâm Đồng den kơno yal càr Lâm Đồng sồr jơh tơl nă cau mŭt tàm càr pal geh sră xét nghiệm virus Sars CoV-2 geh cồng nha ờ bơtờp. Bi sơrbac mhar ngan lòt tus hờ hìu sơnơm ƀòn dờng nàng lơh test mhar mơya tŭ tus anih den dờp wơl jơnau yal là hìu sơnơm ơm ing lơh broă do. Ờ gơtùi lơh geh xét nghiệm, ờ geh sră lòt gùng, gơl gùng rê wơl hờ hìu bơh bi Tuyết dê lồi dŭt pal tơn jŏ tai. Bi Trần Thị Tuyết, đơs: Bol añ gam gơtìp kòl mờ ờ gĭt pal lơh bè lơi nàng mŭt geh tàm càr Lâm Đồng. Dilah bè tŭ do, wơl lòt tus wơl hờ Pleiku nàng xét nghiệm tơnơ̆ hơ̆ wơl rê wơl tai, lòt rơndeh sùm pal roh bơh 15 tus 16 jiơ bè hơ̆ den là bòl glar ir ai làng bol in. Kung kơ̆p kờñ ngan sơl ban, ngành dong kờl bè lơi hơ̆ nàng geh lòt rê ƀươn ƀoài rlau dùl êt.

Ai bi Trần Anh Kiệt là cau măy rơndeh pơndiang phan lòt jăt gơl gùng bơh ƀòn dờng Buôn Ma Thuột tus ƀòn dờng Hồ Chí Minh lồi dŭt pal tơ wơl bồ rơndeh nàng rê wơl hờ hìu, pal kong ơm rlô lòt rơndeh dùl tơngai tài bơh kung ờ jòi geh sơl anih lơh broă test mhar kòp Covid-19 sơl. Bi Trần Anh Kiệt, đơs: Bàr pe ngai lài kung sùm test sơl mơya sră jơh tơngai ai ngui, cau sồr pal test wơl den hơ̆ sồng geh ai lòt, ờ geh sră hơ̆ den he lòt tiah lơi kung ờ gơtùi ờ, mù tàm hơ̆ cau sồr wơl rê wơl.

Ồng Nguyễn Ngọc Thịnh- Phó Kuang ătbồ Hìu sơnơm ƀòn dờng Buôn Ma Thuột, pà gĭt: tài bơh jơnau kờñ test mhar kòp Covid-19 bơh làng bol dê gơguh uă nisơna tàm tŭ phan ngui nàng xét nghiệm mhar bơh hìu sơnơm dê geh dùl êt gời lơm, ờ tơl nàng lơh jăt jơnau kờñ bơh làng bol dê den tàng hìu sơnơm pal ơm ing lơh broă do. Ồng Nguyễn Ngọc Thịnh, đơs: Tŭ do, pal dan jơnau đơs bơh Sở dê, dùl là blơi di jăt jơnau sồr hơ̆ là pal jòi cau blơi, bàr là pal sồr cau blơi bal mờ khà nđờ hơ̆ den he kờp dŭ khà cau tus mờ he dan sồr cau blơi. Tŭ do, jơnau kờñ bơh làng bol dê kung bè mpồl lơh sa kă bro dê uă ir.

Tơnơ̆ 2 ngai yồng kƀàng lơh broă lơh test mhar kòp Covid-19, cơldŭ kham uă kòp Hoàn Hảo pal ơm ing wơl lơh broă do tài bơh ờ hềt geh Sở Y tế  càr Dăk Lăk ai sră ai gơnoar lơh broă

Bal mờ hìu sơnơm ƀòn dờng Buôn Ma Thuột, tàm ù tiah càr Dăk Lăk dê gam geh 2 mpồl tai lơh broă lơh test mhar kòp Covid-19, hơ̆ là hìu sơnơm Kơnòm dềt Tâm Đức mờ cơldŭ kham uă kòp Hoàn Hảo. Mơya, tài bơh ờ hềt geh bơta ai gơnoar bơh Sở Y tế dê, den tàng tơnơ̆ 2 ngai yồng kƀàng yal lơh xét nghiệm mhar kòp Covid-19, 2 mpồl do kung neh ơm ing lơh broă lơh xét nghiệm do. Bè hơ̆, tus tŭ tơngai do, càr Dăk Lăk kung gam lời gời sơl broă lơh xét nghiệm mhar kòp Covid-19. Làng bol kờñ lòt tus ală tiah sồr pal geh cồng nha xét nghiệm ờ bơtờp mờ virus Sars CoV-2 lồi dŭt pal ơm kơ̆p. Rài kis, broă lơh lồi dŭt pal kơnờm jơh lơm tàm sră xét nghiệm.

Jăt ồng Trịnh Quang Trí- Kuang ătbồ Anih tờm gròi sền kòp tê jê să càr Dăk Lăk dê đơs, sră cồng nha xét nghiệm mhar kòp Covid-19 mìng gơtùi dờp dùl nă cau geh halà ờ bơtờp mờ virus tàm tơngai ai mẫu xét nghiệm lơm. Gơ ờ geh kuơ jŏ jòng, kung ờ gŏ đơs ngan là cau do ờ gơtìp bơtờp tàm tơngai tus ờ. Den tàng bè hơ̆, pal kơlôi sơnơng kờp dŭ wơl broă sền swì sră cồng nha xét nghiệm mhar kòp Covid-19 bè “sră lòt gùng” nàng lòt rê mờ lơh broă tài bơh jơnau do lơh gơlik bơta kơn jơ̆ bè đah priă jền mờ bơta pràn, mpồl cau lơh broă tàm tŭ cồng nha den ờ gŏ uă. Ồng Trịnh Quang Trí- Kuang ătbồ Anih tờm gròi sền kòp tê jê să càr Dăk Lăk, đơs: Tŭ do, he bơyai lơh bè lơi nàng làng bol in rê cau lòt tus hờ hìu sơnơm xã nàng yal nàng he in gĭt geh. Ai tŭ do mờ lòt xét nghiệm mhar mìng gơwèt mờ cau măy rơndeh taxi, rơndeh pơndiang phan lòt gùng jòng den lơh gời ờ sa priă ai cau in, bơta hơ̆ den hơ̆ sồng lơh geh bơta ƀươn ai làng bol in, den hơ̆ sồng ai tơl bơta tam dră mờ kòp in.

Jăt ồng Nay Phi La- Kuang ătbồ Sở Y tế càr Dăk Lăk đơs, dilah dùl nă cau gam gơdram kòp, lơh xét nghiệm gơ ai cồng nha ờ bơtờp mờ kòp, mơya tơnơ̆ hơ̆ tàm khăt tŭ lơi khi kung gơtùi lơh bơtờp virus ai cau ndai in. Den tàng bè hơ̆, bè đah bơta jak chài, cồng nha xét nghiệm ờ bơtờp mờ kòp nàng lòt rê đah ală tiah ờ gŏ geh kuơ uă bulah sră pơ àr do geh ai ngui bơh 2 tus 3 ngai. Bơta do geh gơtha là, sră cơng tàng xét nghiệm ờ bơtờp kòp ờ geh uă bơta kuơ tàm broă lơh rơcăng sơndră kòp Covid-19 mơya gam lơh gơlik uă kal ke ai gah lơh sơnơm mờ làng bol in, lơh lơyai jun phan bơna kă bro, lơh gơlik tai bơta kơn jơ̆ bè lơh sa ai ală tiah in.

Cau cih Vũ Nam Trang- Cau mblàng Lơ Mu K’Yến