VOV4.K’ho- Tơnơ̆ mờr 1 poh ơm ing drơng broă test kháng nguyên kòp Covid-19 tàm Hìu sơnơm ƀòn dờng Buôn Ma Thuột, Hìu sơnơm kơnòm dềt Đức Tâm mờ cơl dŭ kham kòp Hoàn Hảo, ngai 13/7, Sở Y tế Dak Lak neh ring bal ai 3 mpồl do in lơh broă wơl drơng broă test kháng nguyên kòp Covid-19 nàng ai sră lòt gùng ai làng bol mờ ală cau măy rơndeh in lòt tus ală tiah sồr pal geh xét nghiệm mhar kòp Covid-19 geh cồng nha ờ bơtờp kòp.

Lài hơ̆, ngai 8/7, Sở Y tế càr Dak Lak geh công văn sồ 2360 bè broă ơm lơh broă test kháng nguyên kòp Covid-19 tàm ală anih kham, sơm kòp tàm ù tiah càr dê nàng gah lơh sơnơm in bơyai lơh sền sơwì, dilah anih lơh broă lơi lơh niam hơ̆ sồng ai gơnoar lơh broă wơl. Bal mờ 3 anih kham sơm kòp pa đơs do, geh ai gơnoar lơh broă tes kháng nguyên kòp Covid-19, Dak Lak kung gam lơh sùm anih test mhar ờ sa priă 100 nă cau dùl ngai ai ală cau măy rơndeh in geh sră măy rơndeh dờng khà C tàm Hìu sơnơm ƀòn dờng Buôn Ma Thuột dê.

Cau mblàng K’Hạnh