VOV4.K’ho- Cục Dia càr Dăk Lăk pà gĭt, bulah bơh bồ nam tus tŭ do, kòp Covid-19 gơbàn kal ke gơrềng tus broă lơh sa kă bro, mơya Cục Dia càr dê neh tă geh rlau 2 rbô 688 tơmàn đong, lơh geh 63% kờp dŭ lài dà lơgar dê jàu mờ gơguh 14% pơndrờm bal dùl tŭ mờ nam lài.

Jăt ồng Ngô Việt Hồng- Phó Kuang ătbồ Cục Dia càr Dăk Lăk dê yal, jơnau bơh tài lơh broă tă dia gơguh pràn là tài bơh ală priă tă bơh ală rơndăp broă lơh ồs đèng măt tơngai gơguh pràn; bơta phan bièr, ơlak, dà lơngồt kung gơguh uă sơl pơndrờm bal dùl tŭ mờ nam lài; bơdìh hơ̆ tai, dia tă bơh dia apah ù, sền gàr tiah ơm kis, lơh sa dềt mờ măy mok...kung gơguh sơl. Bơh tŭ do tus lồi nam, Cục Dia càr Dăk Lăk pơn jăt tai lơt jăt niam jơnau sồr bơh kấp hơđang dê lam lơh jăt ală tơngume tă dia; sơlơ tơnguh tai broă lơh pơgồp bal mờ gơnoar ătbồ ală tiah lơh pràn broă lơh lùp sền, lòt sền nàng tă dia, dồs gơkòl priă dia lơh geh cồng nha.

Cau mblàng Lơ Mu K’Yến