VOV4.K’ho- Tàm xã Ea Sôr, kơnhoàl Ea Kar, càr Dak Lak, dùl ƀlàng tơrgùm bràs tìs mờ kơrnoat boh lam gơguh tus gĭt nđờ rơbô khối geh dùl tập đoàn khoáng sản crơng gơs, lơh broă kềng gah Gùng dờng 29 tơn. Ƀlàng bràs do là tiah tơrgùm, ntrờn, pơn diang bràs đah 3 càr, Phú Yên, Gia Lai mờ Dak Lak, ƀlàng bràs do neh geh bơh 2 nam do, bulah làng bol uă dơ̆ geh jơnau yal mờ ală kấp lơh broă geh gơnoar.

Dùl ngai lồi nhai 4, bol añ geh mat tàm tiah ƀlàng bràs tìs mờ kơrnoat boh lam gơwèt ù tiah ƀòn Ea Puk, xã Ea Sôr, kơnhoàl Ea Kar, càr Dak Lak dê. Tàm do, dùl ƀlàng bràs dờng ngan, mờ gĭt nđờ rơbô khối bràs geh tơrgùm wơl jat kềng gah Gùng dờng 29.  Tàm ƀlàng bràs do tơn, cau tờm mpồl lơh sa kă bro neh lơh tơn dùl nơm hìu nàng đơng lam broă kă bro bràs, cau lơh broă geh tus mờr jơ̆t nă. Ồng Hờ A Sủng, Kuang atbồ ƀòn Ea Puk pà gĭt, ƀlàng bràs do neh “geh” bơh nam 2019 mờ bơh tŭ geh ƀlàng bràs do, neh lơh sơrlồng sơrlàng jơh ƀòn lơgar tàm do. Mờ uă ngan rơndeh pơndiang bràs dờng, kơn jơ̆, thùng rơndeh dờng, sùm pơn diang bràs lik mut tàm do mờ lơh ờ diơng gùng lòt lơh broă, gùng làng bol lơh broă sa mờ jơh bal Gùng dờng 29 sơl, uă gơl gùng gơtìp tơrlah jơh, pơhìn rềs àr gùng lòt sùm gơlik geh, lơh làng bol kơlôi rơngòt ngan mờ ờ suk ơm ngan.

Làng bol neh geh uă jơnau đơs bè broă ƀlàng tơrgùm bràs do. Rơndeh dờng, kơn jơ̆ là uă ngan, rơndeh den bơh 15 tus 20 nơm sùm pơndiang bràs. Broă pơn diang bràs lơh ờdiơng gùng lòt uă ngan mờ lơh rài kis làng bol lơh broă sa bol añ gơtìp sơrlồng sơrlàng uă ngan sơl. Làng bol neh geh uă ngan jơnau đơs bloh, geh jơnau yal mờ xã, mờ xã đơs là neh geh jơnau yal tus mờ kơnhoàl, den kơ̆p kơnhoàl bơsong mbè lơi den làng ờ gŏ gĭt ờ.

Ƀlàng bràs tìs mờ kơrnoat boh lam neh lơh broă sùm 2 nam do

Ồng Hoàng Anh Dũng, Phó chủ tịch UBND xã Ea Sôr, kơnhoà Ea Kar, pà gĭt, tiah ƀlàng tơrgùm bràs tìs mờ kơrnoat boh lam tàm ƀòn Ea Puk gơwèt bă ù 102, sră wac sềr  rùp ù tiah sồ 05 mờ kờp jơh bă ù ơnàng mờr 13 rơbô thơk vuông. Bă ù do bơh ồng Phan Đình Thái Anh (deh nam 1979, ơm tàm sơnah ƀòn Thành Nhất, ƀòn dờng Buôn Ma Thuột) là cau tờm. Ồng Hoàng Anh Dũng đơs ngan, jơh bă ù ƀlàng bràs tŭ do gam là ù lơh sa suơn sre. Xã sền gĭt do là broă lơh tìs mờ jơnau kờñ ngui ù. Tàm nhai 3 nam 2020, xã Ea Sôr neh crơng gơs mpồl lòt sền mờ sền gĭt geh pơgap 10 rơbô khối bràs geh tơrgùm tìs mờ kơrnoat boh lam tàm do. Xã kung neh sồr kấp kơnhoàl lơh broă bal nàng bơsong.

Bè gơnoar atbồ dà lơgar den sơrlèt mờ gơnoar bơh xã dê. Xã kung geh sră nggal sồr bloh, pal geh gah lơh broă kấp hơđang sồr, mut lơh bal den hơ̆ sồng gơtùi lơh.

Gĭt nđờ jơ̆t nơm rơndeh dờng kơn jơ̆ mut lik sùm lơh làng bol ƀòn Ea Puk ờ suk ơm ngan

Gơrềng tus ƀlàng bràs gĭt nđờ rơbô khối tìs mờ kơrnoat boh lam ơn tơn jat kềng gah Gùng dờng 29, ồng Nguyễn Ngọc Duẩn, Kuang atbồ phòng Tài nguyên mờ môi trường kơnhoàl Ea Kar, pà gĭt, kơnhoàl pa crơng gơs mpồl lơh broă ală gah tàm hơ̆ geh ală gah lơh broă Tài nguyên, Kuang àng, tă dia nàng lòt sền ƀlàng bràs do. Bơh sơnrờp sền gĭt, mpồl lơh sa kă bro neh ngui ù tiah ờ di mờ jơnau kờñ. Gơwèt mờ tiah tờm ală bràs do, bơh jơnau yal bơh mpồl lơh sa kă bro dê là geh tơnhào mờ pơndiang bơh 2 càr Phú Yên mờ Gia Lai tơrgùm jun rê tàm do. Mpồl lơh broă ală gah mìng lòt sền bơh sră pơ àr yal tă dia lơm, ờ hềt gơtùi sền gĭt di pal bơh lơi ală bràs do geh tơrgùm geh di mờ adat boh lam halà ờ. Bè jơnau lơh gơbàn mbè lơi ƀlàng bràs dờng ngan tìs mờ kơrnoat boh lam kấp xã neh geh jơnau yal mơya gam lơh broă sùm bơh nam 2019 tus tŭ do, ồng Duẩn đơs là, broă lơh glài ală bơta lơh tìs là kal ke ngan tài bơh Phòng Tài Nguyên mờ Môi trường ờ tơl cau lơh broă. Bè nùs nhơm lơh glài lơh tìs, ồng Duẩn pà gĭt, kơnhoàl Ea Kar lơh ngan lơh klài mờ sồr mpồl lơh sa kă bro pal ntrờn tiah ndai, ai wơl ù tiah bè ờs be lài do dê.

Ngan là tàm do là broă ngui ù tiah ờ di mờ jơnau kờñ. Tơnơ̆ tŭ lơh glài mờ priă den sồr pal lơh niam wơl ù tiah bè bơh sơnrờp. Pơnyơu 3 rơbô khối bràs den tàm pơgap 30 ngai pal bơsong jơh.

Dùl ƀlàng tơrgùm bràs tìs mờ kơrnoat boh lam gơguh tus gĭt nđờ rơbô khối, jat kềng gah Gùng dờng 29 tơn, rơndeh rơndồ lòt rê ur ar, uă ngan cau sền gŏ, uă ngan jơnau đơs bơh làng bol dê đơs wơl, mơya sùm 2 nam do kung gam ờ hềt geh bơsong jơh sơl. Bơta do pà gŏ, broă lơh atbồ ù tiah, lơh sa kă bro phan tàm ù tiah do dê gam geh là bơta ờ niam. Bơta pơhìn kă bro bràs tìs blăc pơr lồm geh lơh ngan ngồn nàng kă bro là uă ngan.

 Cau cih Công Bắc- Cau mblàng K’Hạnh