VOV4.K’ho- Nàng kờñ di tŭ pơndờm pơnđiang cau bơsram dờng jơi bơtiàn kòn cau dùl êt nă cau geh cồng nha jak ngan tàm broă bơsram, mho ngai 12/11, Mpồl tam klăc ơruh pơnu Việt Nam càr Dăk Lăk pơgồp bal mờ Mpồl cau bơsram dờng Việt Nam càr dê bơyai lơh dơ̆ tìp măt, jờng rơ cau bơsram dờng jơi bơtiàn kòn cau dùl êt nă cau pơnrơ jak dơ̆ 23, nam 2021. Tài gơrềng bơh kòp Covid-19 dê den tàng broă lơh geh bơyai lơh pờ tơn tàm internet tus mờ 15 anih tàm tơrbŏ bal tàm ală kơnhoàl, thị xã mờ ƀòn dờng tàm càr.

65 nă cau bơsram dờng jơi bơtiàn kòn cau dùl êt nă cau càr Dăk Lăk lơh geh broă bơsram sră jak mờ jak ngan nam 2020- 2021 geh pà sră jờng rơ

Càr Dăk Lăk tŭ do geh pơgăp 9 rbô 800 nă cau bơsram dờng gam bơsram tàm ală hìu bơsram cao đẳng, đại học tàm gùt lơgar; tàm hơ̆ geh rlau 2 rbô nă cau bơsram dờng jơi bơtiàn kòn cau dùl êt nă cau. Tàm khà do geh uă krơh pơnrơ jak neh lơh geh cồng nha bơsram jak ngan, jơh nùs tus bal ală srơh mờ lơh broă wèt tus mpồl bơtiàn. Tàm broă lơh, ală cau bơsram dờng neh cribơyai, tàm yal tơngĭt bal bè ală tŭ bơsram, lơh ngan sơrlèt gan kal ke mờ tam pà tŭ jiơ nàng tus bal ală srơh, lơh broă dong kờl is. Di tàm dơ̆ do, mpồl bơyai lơh kung jờng rơ 65 nă cau bơsram dờng jơi bơtiàn kòn cau dùl êt nă cau càr Dăk Lăk lơh geh broă bơsram sră jak mờ jak ngan nam 2020- 2021.

 Cau mblàng Lơ Mu K’Yến