VOV4.K’ho- Ủy ban Nhân dân kơnhoàl Krông Păk, càr Dak Lak neh tơn jơh lơh broă Chủ tịch Ủy ban Nhân dân xã Vụ Bổn tài lời kòp Covid-19 bơtờp tàm mpồl bơtiàn. Jat hơ̆, ồng Trần Văn Sáu, Chủ tịch Ủy ban Nhân dân xã Vụ Bổn, kơnhoàl Krông Păk, càr Dak Lak gơtìp tơn jơh lơh broă 15 ngai, kờp bơh ngai 10/8 tus ngai 24/8/2021. Jơnau mờ ồng Sáu gơtìp Ủy ban Nhân dân kơnhoàl tơn jơh lơh broă là tài đơng lam broă lơh rơcang sơndră kòp Covid-19 ờ di tŭ, lời tơrgùm gal cau mờ sồr tam cah is tàm hìu ờ kràñ, lời kòp bơtờp tàm mpồl bơtiàn.

Kờp tus ngai 10/8, tàm xã Vụ Bổn geh 2 tiah geh kòp Covid-19 tàm thôn 6 mờ thôn 7 mờ 19 nă cau kòp. Tàm hơ̆ mìng is tiah geh kòp tàm thôn 7 là 16 nă. Khà cau bơtờp kòp Covid-19 git gŏ tàm Vụ Bổn tàm ngai 10/8 neh lơh khà cau bơtờp kòp tàm kơnhoàl Krông Păk gơguh mhar, gơ gơs là kơnhoàl geh khà cau bơtờp kòp Covid-19 uă dơ̆ 3 tàm Dak Lak. Tŭ do, ală anih lơh broă geh gơnoar càr Dak Lak gam wàng se, lơh ngan jòi cau ơm rềp, xét nghiệm mờ lam lơh ală broă lơh sơnơm tơmba nàng gròi sền kòp Covid-19 tàm xã Vụ Bổn.

Cau mblàng K’Duẩn