VOV4.K’ho- Mờ kơ̆p kờ nàng gĭt re dà bal mờ broă lơh tŭ gơtìp bŭ dà ai kơnòm dềt tàm ală ƀòn tiah ngài in, ală cấp đoàn tàm càr Dak Lak neh lơh jăt uă broă lơh, pờ ơdŭ bơsram re dà ờ sa priă ai kơnòm dềt in. Tàm hơ̆, broă bơceh lơh bơh Huyện đoàn Cư̆ Mgar là ai “tơnao dà ntrờn” tus tàm ală ƀòn, dong kờl geh uă kơnòm dềt tàm tiah kal ke geh bơsram re dà.

Lơh ngan tŭ trồ drim lài mờ tŭ lòt lơh broă, lŏ Đinh Thị Yên, kis tàm ƀòn Hiệp Hoà, xã Quảng Hiệp, kơnhoàl Cư̆ Mgar, càr Dak Lak pơn diang kòn ùr 7 sơnam tus mờ ơdŭ bơsram re dà pa geh pờ rềp tềng hìu. Lŏ Yên yal, tŭ do gam tàm kàl rơlô bơkang bơh ală kơnòm bơsram dê, ùr bơklao lŏ ndrờm lòt lơh broă den tàng pal pơyoa kòn mờ mò ồng sền gròi. Bŭ lah nting kòn mìng nhơl gùt dar tàm hìu, mơya lŏ kung gam ờ sŭk ngan tài pa do, sră ƀăo sùm geh jơnau yal bè ală dơ̆ bŭ dà mờ rềs àr lơh chơ̆t jê gơtìp.

Cau pơgru bơto tơl nă kơnòm dềt in bè broă re dà

Tàm ƀòn lŏ ơm kis den geh uă ngan tơnao dà geh làng bol tờ is. Den tàng, tŭ kơno jơnau yal geh ơdŭ bơsram re dà ờ sa priă ai kơnòm dềt in geh pờ tơn rềp tềng hìu, lŏ neh dan cih măt mờ rơndăp tơngai nàng pơn diang kòn tus bơsram re dà: “Pa do, cau kis tàm ƀòn rềp bal yal hơ̆ sồng gĭt tềng tiah do geh tơnao bơsram re dà den tàng añ neh tus dan cih măt. Ai kòn in lòt bơsram re dà den tơnơ̆ do kòn geh pleh mờ rềs àr bè bŭ dà tài tŭ do geh uă ngan dơ̆ gơtìp chơ̆t bŭ dà, añ ngòt den tàng neh tus dan cih măt ai kòn in bơsram re dà. Añ gŏ ală ơdŭ bơto re dà ờ sa priă bè do den geh kuơ ngan ai làng bol in, tài lài ngan là ờ roh priă, dơ̆ bàr tai là ală bơyô geh lòt bơsram den geh uă ngan là bơyô kis tàm xã, di gơlan geh tìp bal”.

Ơdŭ bơto re dà ờ sa priă geh mpồl Tài kơnòm dềt kờñ gơboh (gơwèt Hội đồng đội kơnhoàl Cư̆ Mgar) pơgồp bal mờ Đoàn ơruh pơnu xã Quảng Hiệp bơyai lơh tàm xã. Tus bal ơdŭ bơsram re dà geh 90 nă kơnòm dềt tàm sơnam bơh 7 tus 15 sơnam, geh tam pà gơs 6 dơ̆ bơsram. Tơl dơ̆ bơsram 1 jơ, geh 2 nă cau bơto atbồ mờ bơto sồr tơn tềng tơnao dà. Bal mờ hơ̆, gam geh bơh 1 tus 2 nă đoàn viên ơruh pơnu dong kờl atbồ ơdŭ bơsram, bơto sồr ală kơnòm tàm broă rơcang re dà, lơh kloh să jan lài mờ tŭ mù tàm tơnao dà.

Ờ mìng kơnòm dềt bơsram re dà mờ ală cau mè, cau bèp kung tus sền mờ chờ hờp bal mờ ală tŭ bơsram

Tàm nggùl nhai, ală cau bơsram geh bơto ală bơta re dà tờm; yal bè bơta gĭt wă bè broă sơndră, pleh mờ rềs àr bŭ dà, broă lơh tŭ geh cau gơtìp bŭ dà. Tơngu me geh ai là jơh ală cau bơsram ndrờm gĭt re dà tơnơ̆ mờ tŭ tơn jơh ơdŭ bơsram.

Pơgru Mai Văn Chuyền, atbồ mpồl Tài kơnòm dềt kờñ gơboh, pơgru bơto re dà tàm ơdŭ bơsram re dà pà gĭt, nàng ơdŭ bơsram re dà geh pờ, mpồl neh lam sồr tă geh mờr 50 tơlăk đong nàng blơi phan, hòi jà ală cau pơgru bơto tàp pràn să jan tàm ală hìu bơsram tàm xã tus bal bơto. Tơnao bơsram re dà lơh is geh ơnàng 5,1 thơ̆k, jòng 15,6 thơ̆k mờ ñhoa 1,2 thơ̆k geh ơn tềng ƀlàng dờng ơnàng tềng đăp hìu làng bol, ngui dà khoàng ƀồm bơh ală hìu làng bol kis tàm ƀòn mờ tàm 2 ngai pal geh lơh kloh niam, ala dà dùl dơ̆. Ơdŭ bơsram geh dờp geh broă kờñ bal bơh làng bol bal mờ gơnoar atbồ tàm do. UBND xã Quảng Hiệp gam dong kờl phan tìm nàng pleh mờ măt tơngai sòl ai ơdŭ bơsram in. “Ală nam lài den mpồl kung bè Đoàn xã Ea Mdroh den geh bơyai lơh tàm tơnao dà bơh hìu bơram cấp 2 Ngô Mây. Mơya tài phan bơna geh ơm kơ̆ dùl bă tiah tàm hìu bơsram den tàng broă kờñ pờ ơnàng tus mờ ală tiah ndai ờ geh, geh tŭ pal lòt tus tàm ală ƀòn kal ke ngan. Den tàng geh dùl nơm tơnao dà bè do den broă lòt tus tàm ală ƀòn, ală tiah gơtìp uă kal ke den geh ƀuơn rơlao. Mờ tơngu me tờm bơh ală tơnao dà tàm do dê den kung geh cèng lòt tus tàm ală ƀòn, lam sồr ai ală kơnòm dềt in gĭt mờ gàr niam ờ do ờ dă tàm tiah dà, broă lơh tŭ geh cau gơtìp bŭ dà, ai kơnòm dềt in gĭt re dà, gĭt lơh gơdờp bal tàm tiah dà”.

Jăt lŏ Võ Thị Mỹ Trinh, Phó Bí thư Huyện Đoàn, Chủ tịch Hội đồng đội kơnhoàl Cư̆ Mgar yal, broă bơto re dà ờ sa priă do gơwèt broă lơh Hoa phượng đỏ, là dùl broă lơh tàm broă lơh ơruh pơnu lơh broă nùs nhơm dong kờl kàl rơlô bơkang nam do bơh ơruh pơnu kơnhoàl Cư̆ Mgar dê wèt tus mờ kơnòm dềt. Do là dùl broă lơh bơceh pa bơh mpồl dê tài ală tơnao dà lơh is do tơnơ̆ mờ tŭ neh ngui den gơtùi yuh dà, rơklồn niam wơl mờ ntrờn lòt tus tàm ală tiah ndai ƀuơn ngan. Kơnờm mờ hơ̆, den tàng gơtùi lơh tàm uă tiah ai ală kơnòm dềt tàm tiah ngài in ờ hoan geh tơl bơta niam nàng tìp mờ broă bơsram re dà. Broă lơh do kung gơtùi lơh uă mờ ai ală xã in lơh. “Tềng đăp măt, bol añ geh lơh tơrlòng sơnrờp ngan tàm xã Quảng Hiệp, tơnơ̆ mờ hơ̆ geh lơh tàm xã Ea Mdroh mờ xã Cư̆ Mgar. Cồng nha mờ broă lơh do geh tơn tàm ală ƀòn den loh làng ngan, tài geh niam rơlao. Mờ hơ̆ geh là pờ sơnrờp ngan ai broă lơh do in. tơnơ̆ mờ tŭ mpồl Tài kơnòm dềt kờñ gơboh lơh mờ lơh geh cồng nha den bol añ gơtùi pờ ơnàng tus tàm ală xã tiah ngài, geh gùng dà broă lơh mờ kơnhoàl nàng lơh geh uă broă gùt mpồl bơtiàn lơh bal ală tơnao dà lơh is nàng cèng tus ală xã in”.

Jăt khà kờp bơh Sở Lao động-Thương binh mờ Xã hội càr Dak lak yal, bơh bồ nam tus tŭ do, tàm càr neh gơtìp 31 dơ̆ bŭ dà lơh 39 nă kơnòm dềt gơtìp chơ̆t, uă rơlao mờr 2 dơ̆ pơn drờm mờ tŭ do nam lài. Den tàng, tàm broă lơh ơruh pơnu lơh broă nùs nhơm dong kờl kàl rơlô bơkang nam do, ơruh pơnu càr Dak Lak neh ai tơngu me sền gàr mờ drơng gàr kơnòm dềt tàm broă lơh mờ lơh jăt broă lơh. Bi Trần Doãn Tới, Phó Bí thư Tỉnh Đoàn, Chủ tịch Hội đồng đội càr Dak Lak pà gĭt: “Tàm tơngai tus den Ban Thường vụ Tỉnh Đoàn geh jào ai anih bơto bơta ngăc ngar bơh Tỉnh Đoàn, geh jà ală cau jăk chài geh broă lơh tờm bè re dà tàm gùt càr bơyai lơh ală ơdŭ bơsram nàng gĭt jơnau tờm bơh mpồl kuang bàng drơng broă đội tàm càr in nàng ală kuang bàng do tus tàm ală tiah bơto sồr ală kơnòm dềt. Mờ tàm tơngai tus kung geh dan môn bơsram bơdìh ơdŭ bơsram hơ̆ là ai geh bơta ngăc ngar re dà ală kơnòm bơsram tàm hìu bơsram cấp 1 mờ cấp 2 in”.

Mờ broă lơh ngan bơh ală mpồl lơh broă nàng dong kờl geh ală bơta ngăc ngar tờm bè broă re dà mờ jơnau ngăc ngar tàm broă sơndră mờ bŭ dà ai kơnòm dềt in, kơ̆p kờñ ală kơnòm dềt geh tai ală jơnau gĭt wă nàng sền gàr is să tờm. Kơnòm mờ hơ̆, pơgồp bal tàm broă tơmù ờ uă ngan ală dơ̆ rềs àr di gơlan gơtìp, nàng ală kơnòm dềt geh dùl kàl rơlô bơkang mùl màl geh kuơ mờ ờ do ờ dă.

Cau cih H’ Xíu-Cau mblàng Ndong Brawl