VOV4.K’ho- Ngai 22/11, tàm tiah tềl kah yau dà lơgar kuơmàng Hìu jàm Buôn Ma Thuột, Tỉnh ủy, Hội đồng Nhân dân, Ủy ban Nhân dân, Ủy ban Mặt trận dà lơgar Việt Nam càr Dăk Lăk neh bơyai lơh chu nàng tơngkah kir sơnrai 81 nam Ngai crơng gơs Đảng bộ càr Dăk Lăk (23/11/1940- 23/11/2021). Tàm dơ̆ bơyai lơh tơngkah kir sơnrai, ală kuang bàng neh bal mờ gơp kah wơl gơl gùng kah yau pơn iờ să ngan bơh Đảng bộ càr Dăk Lăk dê tàm 81 nam crơng gơs, bơt bơtàu, bơtàu tơnguh mờ dờng pràn.

Bơh lồi nam 1940, chi bộ Đảng Cộng sản sơn rờp tàm Dăk Lăk geh crơng gơs tàm Hìu jàm Buôn Ma Thuột, tus tŭ do, Đảng bộ Dăk Lăk neh geh 20 đảng bộ gơwèt Đảng bộ càr, rlau 700 mpồl duh broă đảng kấp hơ đơm mờ rlau 83 rbô nă đảng viên. Tàm dơ̆ chu ñàng tơngkah kir sơnrai 81 nam Ngai crơng gơs Chi bộ Đảng sơn rờp tàm Dăk Lăk, ala mat kuang đơng lam bồ Đảng bộ mờ làng bol ală jơi bơtiàn kòn cau tàm càr ai tơnggŏ nùs nhơm lơh ngan tơnguh bơhiàn kah yau pơn iờ să, pơn jat tai tam gơl pa pràn kơldang bè git wă mờ broă lam lơh, tơnguh tơl bơta pràn, bơta ƀuơn mờ bơta niam, chồl pràn bơtàu tơnguh lơh sa- mpồl bơtiàn, bơt bơtàu càr Dăk Lăk ngai sơlơ pas sơm, bềng bơta niam chài.

Cau mblàng K’Duẩn