VOV4.K’ho - Tơngai do, Mặt trận dà lơgar ală cấp càr Dăk Lăk neh lơh jăt uă broă lơh mùl màl nàng lam sồr ală làng bol tus bal rơcang sơndră mờ kòp gơtờp. Bơh tŭ hơ̆, pơgồp bal mờ cấp ủy, gơnoar atbồ tàm càr bal mờ gùt làng bol nàng kơrian kòp gơtờp, sền gàr bơta pràn kơl dang să jan mpồl bơtiàn.

Tơnơ̆ mờ tơngai wàng se, kơrian rơcang sơndră mờ kòp Covid-19, rài kis bơh làng bol tàm ƀòn Tơng Jú, xã Ea Kao, ƀòn dờng Buôn Ma Thuột neh rê bè ờs pa, di tus tàm kàl pic kơphe.

     Ủy ban Mặt trận Dà lơgar càr Dăk Lăk là anih tờm dờp ală phan dong kờl rơcang sơndră mờ kòp Covid-19

Mò H Yam BKrông, Kuang atbồ ƀòn Tơng Jú yal, tŭ bồ nhai 10, tŭ ƀòn gơtìp mpồl cau gơtìp kòp Covid-19 mờ git nđờ rơhiang nă cau gơtìp, jơh gùt ƀòn geh rơlao 440 hìu, 2 rơbô 200 nă làng bol pal lơh jăt broă wàng se, kơrian tam cah ngài lơh sơnơm. Kơnờm mờ broă tus bal, dong kờl bơh ală cấp, ală gah lơh broă, ală mpồl lơh broă nùs nhơm dong kờl, broă lơh ñhăp ñhar bơh mpồl covid mpồl bơtiàn, làng bol ndrờm iang nùs tàm broă tam cah ngài, lơh jăt nền nòn ală kơrnoăt tàm broă rơcang sơndră mờ kòp gơtờp. Broă tam klăc bal, dùl nùs bal bơh làng bol neh pơgồp bal tàm broă dong kờl làng bol sơndră mờ kòp gơtờp, ai rài kis rê bè ờs wơl. “Bơh cấp càr tus cấp xã, geh ală cau geh nùs nhơm niam sùm sền gròi dong kờl làng bol tàm ƀòn tàm tơngai tam cah ngài. Mpồl covid mpồl bơtiàn tàm ƀòn geh 17 nă cau lơh broă sùm, lơh ngan drơng làng bol in bơh broă saào sa hơ̆ sồng tus mờ broă lơh sa bè ròng sur, kơnrồ den mpồl covid kung pal lơh tus gùng tus dà, den tàng làng bol iang nùs ơm tàm hìu. Tŭ do, rê wơl mờ rài kis bè ờs den kung pal lam sồr, bơto bơtê làng bol pal lơh jăt niam broă rơcang sơndră mờ kòp gơtờp”.

      Mặt trận Dà lơgar càr Dăk Lăk neh tơnguh gơnoar tam klăc bal tơrgùm bal làng bol sơndră mờ kòp gơtờp

Tàm gùt càr Dăk Lăk, ală mpồl covid mpồl bơtiàn tàm ală ƀòn, mpồl ƀòn neh lơh broă bal mờ ală mpồl lơh broă lam lài, lơh broă nùs nhơm dong kờl tus bal rơcang sơndră mờ kòp gơtờp. Tus tŭ do, càr kung gam geh sùm 4 rơbô 218 mpồl covid mpồl bơtiàn tàm 15 kơnhoàl, thị xã, ƀòn dờng, bơta tờm là kuang bàng lơh broă đah mặt trận, mpồl lơh broă tàm ƀòn. Kơnòl tờm bơh ală mpồl do dê là sền gròi ală cau tus bơh tàm tiah gơtìp kòp, broă lơh jăt ală broă tam cah ngài tàm hìu, lam sồr làng bol lơh jăt ală kơrnoăt bè broă rơcang sơndră mờ kòp. Mò H Kim Hoa Byă, Kuang atbồ ban Dân vận, Chủ tịch UBMT Dà lơgar Việt Nam càr Dăk Lăk pà git, bơdìh mờ broă tam pà broă lơh tàm ƀòn, mặt trận ală cấp gam tơnguh gơnoar tàm broă hòi jà, lam sồr geh ală bơta pràn ai broă tam dră mờ kòp gơtờp tàm tiah hơ̆ tơn; lơh jăt ờ uă broă lơh niam, bơceh pa nàng dong kờl ai ală mpồl lơh broă tus bal tam dră mờ kòp tàm tiah sơnrờp ngan. “Tơnguh geh nùs nhơm dong kờl bal tàm mpồl bơtiàn, tàm hơ̆ uă ngan là ală hìu làng bol mờ tơl nă cau kung neh geh kơnòl rơlao tàm broă rơcang sơndră mờ kòp gơtờp. Dơ̆ bàr là kung neh geh uă broă dong kờl, broă pơgồp bal bè dơ̆ sào nùs nhơm ha là ală dơ̆ sào 0 đong. ală làng bol kung neh git geh kơnòl rơlao tàm broă rơcang sơndră mờ kòp covid-19 gơtờp, dong kờl gơnoar atbồ xã tàm broă hòi jà geh ală bơta pràn nàng dong kờl ai ală tiah tam cah is in kung bè ală anih mờ ală tiah gơtìp wàng se, kơrian in”.

Ồng Phạm Minh Tấn, Phó Bí thư Thường trực Tỉnh uỷ Dăk Lăk đơs, Mặt trận Dà lơgar ală cấp càr Dăk Lăk neh tơnguh niam gơnoar tam klăc bal, tơrgùm ală làng bol tàm broă tus bal rơcang sơndră mờ kòp covid-19 tàm ƀòn. Bơh đah Mặt trận, tus tŭ do càr neh dờp bơh ală mpồl lơh broă, mpồl lơh sa kă bro, cau geh nùs nhơm niam geh rơlao 34 tơmàn 500 tơlăk đong; 10 rơbô kơl dung phan rài kis mpồl bơtiàn, 200 rơbô bộ kít xét nghiệm mhar kòp covid-19. Mặt trận Dà lơgar ală cấp kung neh lam sồr mờ jun git nđờ rơhiang tấn phan sa, phan ngui nàng dong kờl làng bol tàm ală tiah gơtìp wàng se, kơrian mờ dong kờl ală mpồl lơh broă tàm broă rơcang sơndră mờ kòp gơtờp. “Mặt trận Dà lơgar neh lơh jăt niam ngan broă do, mờ ală broă hòi jà tă pơgồp bal phan bơna bè phan nàng dong kờl làng bol gơtìp kal ke. Tỉnh ủy, gơnoar atbồ ală cấp, cấp ủy đảng mờ jơh gùt mpồl lơh broă chính trị ndrờm geh dờp cồng nha dờng ngan bơh Mặt trận Dà lơgar tàm tơngai pa do. Bol añ pin dờn là tơnguh bơta pràn tam klăc bal gùt jơi bơtiàn kòn cau di gơlan he geh kơrian kòp Covid-19 do”.

Tơnguh gơnoar tam klăc bal, tơrgùm bal làng bol, Mặt trận Dà lơgar ală cấp càr Dăk Lăk kung gam lơh ngan pơgồp bal mờ gơnoar atbồ ală xã nàng drơng gàr, dong kờl làng bol. Broă nùs nùs bal, tam klăc bal mờ jơnau git wă bơh tơl nă làng bol tàm mpồl bơtiàn geh ai bơta pràn nàng wàng se, kơrian kòp gơtờp, kờ` ai rài kis rê bè ờs wơl.

Cau cih H’ Xíu-Cau mblàng Ndong Brawl