VOV4.K’ho- Tài gơrềng bơh kòp dờng Covid-19, uă nhai do ală mpồl lơh sa kă bro pơn diang phan tàm Dak Lak gơtìp gơmù priă lơh geh bơh 70 tus 80%, geh tŭ ờ geh priă lơh geh lơi pal ơm ing lơh broă. Tềng đap bơta kal ke bơh mpồl lơh sa kă bro dê, tơrgùm ală mpồl rơndeh pơndiang phan Dak Lak dan mờ ală anih lơh broă geh gơnoar Tơrmù dia, priă jền halà tơn jŏ tơngai tơm dồs, tơm bảo hiểm ai cau lơh broă in nàng ală mpồl lơh sa kă bro in sơr lèt gan tơngai kal ke bè tŭ do.

Công ty TNHH Thương mại mờ Dịch vụ vận tải Hải Cường (hìu lơh broă tàm ƀòn dờng Buôn Ma Thuột) geh 8 nơm rơneh pơn diang năc jơnờng bĭc lòt sùm bơh Dak Lak tus Hà Nội, mờ rlau 30 nă cau lơh broă, tàm hơ̆ geh cau măy rơndeh, cau drơng broă tàm rơndeh, kế toán, cau tui àñ phan. Ồng Nguyễn Hải Cường – Kuang atbồ Công ty TNHH Thương mại mờ Dịch vụ vận tải Hải Cường pà gĭt, tài bơh kòp den uă nhai do khà năc lòt tàm rơndeh gơmù uă ngan, ală rơndeh ờ lơh broă pơn diang năc jun mờ rò năc bơh Dak Lak lòt tus Hà Nội mờ sơlơ̆u wơl lơh mpồl lơh sa kă bro gơtìp hoàc huơr. Bulah hoàc huơr mơya công ty kung pal dờp tơl ală bơta dia, priă tă halà lơh jat kơnòl broă tong Bảo hiểm xã hội ai cau lơh broă in jat di jơnau sồr. Dilah ờ geh bơta dong kờl di tŭ den bơta digơlan ală mpồl lơh sa kă bro gơtìp tơn jơh lơh broă.

Tàm tơngai do den mpồl lơh sa kă bro pal bơsir hoàc huơr pơgap 100 tơlak đong dùl nhai. Ală priă do tàm hơ̆ geh, priă tơm priă nhai cau lơh broă in, priă tă apah ƀlàng ơn rơndeh, priă tă lòt rê tàm gùng, priă cồng ngân hàng. Bol añ dan tus mờ ală anih lơh broă geh gơnoar bè Sở Giao thông, Cục dia càr, ală Ngân hàng tơrmù priă cồng, dia VAT, priă tă lòt rê tàm gùng... Mìng geh bè hơ̆ den bol añ hơ̆ sồng gơtùi lơh broă nàng tŭ kòp geh sền gròi den geh lơh broă wơl.

Tài bơh kòp Covid-19 bơtờp wơl, ală mpồl lơh sa kă bro pơndiang năc tàm Dak Lak pal ơm ing lơh broă halà lơh broă dimơ

Tơrgùm ală mpồl rơndeh pơn diang phan Dak Lak geh 40 mpồl lơh sa kă bro pơndiang phan, mờ mờr 18 rơbô nơm rơndeh pơndiang năc mờ phan bơna ală bơta. Jat ồng Phạm Văn Mạnh – Chủ tịch Tơrgùm ală mpồl pơndiang phan Dak Lak yal, tài bơh kòp Covid-19 bơtờp wơl den gơrềng uă ngan tus broă lơh sa kă bro bơh gah pơndiang phan bơh ală mpồl lơh sa kă bro dê.

Bè, ală rơndeh pơndiang năc bè rơndeh năc, rơndeh bus, rơndeh taxi ndrờm pal tơrmù ală rơndeh lơh broă, khà năc geh pơndiang... Priă lơh geh kờp bal bơh ală mpồl lơh sa kă bro gơmù bơh 70 tus 80%, tàm tŭ jơh ală mpồl lơh sa kă bro drờm càn priă bơh Ngân hàng dê nàng blơi rơndeh rơndồ pơndiang. Bơdìh hơ̆, ală mpồl lơh sa kă bro gam pal tơm priă nhai mờ dong kờl priă jền ờ geh broă lơh ing ai kuang bàng  lơh broă mờ cau lơh broă in; tơm priă Bảo hiểm xã hội, Bảo hiểm Y tế; priă tă tơm tàm gùng lòt rê; priă tă lơh niam gùng lòt; priă dia ală bơta; priă cồng ngân hàng...

 Ồng Phạm Văn Mạnh yal tai, tềng đap ală bơta kal ke pa yal, Tơrgùm ală mpồl rơndeh pơdiang phan neh lơh sră nggal dan mờ anih lơh broă geh gơnoar nàng dong kờl ai ală mpồl lơh sa kă bro in tàm tơngai kòp Covid-19 kung gam gơlik geh kal ke.

Bol añ neh geh sră nggal dan mờ Bộ Tài chính mờ anih lơh broă dia sền sơwì ai dia VAT gơwèt mờ mpồl lơh sa kă bro gơtùi tơrmù bơh 1 tus 2% pơndrờm mờ 10% bè jơnau sồr lài do; bè ngân hàng bol añ kung kơ̆p kờñ khi lời ing dồs ờ kờp priă cồng tàm pơgap 12 nhai bơh nam 2021; ai gam bè broă tơm priă Bảo hiểm xã hội, bol añ kung geh jơnau dan mờ Bộ Lao động- Thương binh mờ xã hội geh jơnau đơs mờ Bảo hiền càr dan ờ duh tơm priă Bảo hiểm ai cau lơh broă in tàm pơgap 1 nam, mờ geh tơm wơl tŭ mpồl lơh sa kă bro lơh broă wơl.

Priă lơh geh bơh ală mpồl lơh sa tàm mpồl Tơrgùm ală mpồl rơndeh pơndiang phan Dak Lak gơmù bơh 70 tus 80%, geh tŭ là ờ geh priă jền tơn

Ồng Lê Đình Minh - Phó Kuang atbồ Sở Giao thông vận tải càr Dak Lak đơs, tŭ do Sở neh dờp geh sră nggal hòi jà dan dong kờl bơh Tơrgùm ală Mpồl rơndeh pơndiang phan Dak Lak dê, Sở neh tơrgùm ală tơngume jơnau đơs, jơnau dan nàng yal mờ UBND càr mờ ală gah geh gơrềng lơh jat broă tơrmù ƀà priă jền jal mhar ai ală mpồl lơh sa kă bro, hợp tác xã lơh sa kă bro pơdiang phan tàm ù tiah càr dê.

Tŭ do, jat jơnau dan bơh Tơrgùm ală mpồl rơndeh pơndiang phan Dak Lak, UBND càr neh jàu Sở Tài chính, Sở Lao động- Thương binh mờ Xã hội, Sở Giao thông, Sở Y tế, Cục dia càr, Ngân hàng, Bảo hiểm... tơrgùm kơlôi sơnơng jơnau bơto pơlam bơh Dà lơgar dê mờ bơta geh ngan tàm ală tiah nàng jòi geh gùng dà broă lơh dong kờl ală mpồl lơh sa kă bro pơndiang phan tàm tơngai ơm ing lơh broă nàng rcang sơndră kòp Covid-19 sơr lèt gan tơngai kal ke bè tŭ do. Tŭ lơi ring bal jơh gùng dà den yal mờ UBND càr in  nàng bơsong jat di jơnau sồr bơh Adat boh lam dê.

Cau cih Tuấn Long- Cau mblàng K’Hạnh