VOV4.K’ho - Jơnau bơh Kuang àng kơnhoàl Krông Păc, càr Dak Lak yal, anih lơh broă lùp khào, Kaung àng kơnhoàl gam bơyai lơh lùp khào nàng gĭt loh tài bè lơi gơtìp tơrlah kơlĭk bơnah lơh găc tàm xã Ea Yiêng lơh 3 nă kòn dềt gơtìp chơ̆t mờ sồt să.

Cau gơtìp chơ̆t geh sền là Gia Nhi, 8 nhai; bàr nă kòn dờng gơtìp sồt să jroă là Du Mi, 7 sơnam mờ Du Hi, 5 sơnam, jơh 3 nă kòn dềt do kis tàm xã Ea Yiêng, kơnhoàl Krông Păc, càr Dak Lak. Dùl nă cau pròc mhàm bơh ală kòn dềt do pà gĭt, broă gơtìp rềs àr do tàm tŭ 3 jơ 30 phút mho ngai 18 nhai 5, tŭ 3 nă kòn dềt do lĭk tus tềng bơnah lơh găc bơh hìu nhă tờm nàng nhơl mờ gơtìp tơrlah kơlĭk hìu lơh gơklơn. tơngai gơtìp rềs àr, uă cau gam lơh broă tàm bơnhă buh găc.

Gŏ ală kòn dềt do gơtìp kơlĭk hìu lơh găc klơn, ală cau neh mahr cèng ală kòn dềt tus hờ hìu sơnơm tiah Tây Nguyên nàng sơm sồr, mơya tài sồt uă ir, oh dềt Gia Nhi neh gơtìp chơ̆t; bàr nă oh Mi mờ Hi neh klàs mờ bơta ngòt rơngơ̆t mờ gam geh sơm tàm hìu sơnơm. Kuang àng kơnhoàl Krông Păc neh tus kơrian tiah gơtìp rề àr, bơyai lơh lùp khào nàng gĭt loh tài bơta lơi.

Cau mblàng Ndong Brawl