VOV4.K’ho- Tơnơ̆ tơngai “geh uă ngan” tus rlau 5 rơbô 300 broă lơh đèng mat tơngai ơn hơđang rơkàng hìu, ală nhai pa do, dùl ròt broă lơh tàm càr Dak Lak neh sồr pal tơrmù ƀà pờ tơlik đèng tàm klo ngai pah ngai dê. Broă ờ pờ đèng tàm tơngai trồ tơngai duh ngan rlau jơh geh gơrềng tus cồng nha bơcri priă lơh  bơh broă lơh dê, mơya jat jơnau mblàng bơh gah lơh đèng dê, bơta do nàng kờñ gàr niam bơta ờdo ờdă ai gùng che ồs đèng in, pleh mờ bơta đèng kơn jơ̆ ir tàm jơh gùng che ồs đèng.

 Tàm tơngai trồ tơngai gơ sòl duh ngan bơh kàl prang Tây Nguyên dê, măy pờ tơlik đèng mat tơngai ơn hơđang rơkàng hìu bơh mpồl lơh sa kă bro Quang Luận dê tàm xã Pơng Drang, kơnhoàl Krông Buk, càr Dak Lak cèng wơl cồng nha 2 dơ̆, tŭ pơgồp bơnah sơn dră wơl mờ bơta duh tàm anih lơh broă dê, mơ kung ai đèng drơng broă lơh sa kă bro phan bơna bơt bơtàu, phơng sih, mơkung geh khà priă lơh geh kơ̆ kơl jap bơh broă tăc đèng ai dà lơgar in. Cau tờm mpồl lơh sa kă bro, mò Nguyễn Thùy Trang, pà gĭt, do là bơnah bơcri priă lơh geh cồng nha ngan đau, bulah pa do pal tơrmù ƀà pờ đèng pah ngai. Mò Trang đơs:

Pơgap mờ do 5 nhai añ crăp ală đèng mat tơngai ơn hơđang rơkàng hìu mờ bơta pràn lơh gơlik 500KWp den priă lơh geh bơh đèng dê pah nhai là geh sùm, pơgap bơh 100 tus 120 tơlak đong. Dilah ờ geh broă lơi gơlik geh den do là dùl gah bơcri priă lơh geh cồng nha ngan đau. Bơh bồ nam tus tŭ do den gah lơh broă ồs đèng geh jơnau sồr tơrmù ƀà pờ đèng, geh ală ngai tơrmù tus 15% bơta pràn đèng pờ tơlik, den bol añ kung pơgồp bal niam ngan sơl; pơnyơu bè 9 jiơ àng drim gơsơ̆t đèng den geh công nhân lơh đèng tus gơsơ̆t, tus 2 jiơ mho den khi geh mat tàm do nàng dong mpồl lơh sa kă bro tơrmù ƀà priă jền.

Ală đèng mat tơngai ơn hơđang rơkàng hìu bơh Công ty Quang Luận- Krông Buk, Dak Lak dê

Kung pal ơm ing pờ tơlik đèng mat tơngai tàm tŭ klo ngai pah ngai bơh 2 nhai do, ồng Vũ Khắc Lợi, ala mat dùl Công ty lơh gơlik phan lơh geh bơh lơh sa suơn sre tăc mờ lơgar ndai lơh tàm Mpồl công nghiệp Buôn Hồ, càr Dak Lak, pà gĭt, nàng ngui geh cồng nha broă lơh đèng mat tơngai ơn hơđang rơkàng hìu bơta pràn lơh gơlik 1MWp, mpồl lơh sa kă bro lơh jat broă ngui đèng tềm pềr, ờdo ờdă jat di mờ jơnau bơto pơlam bơh gah lơh broă geh gơnoar dê, mơkung pơn jat tai pờ ơnàng broă lơh sa. Ồng Vũ Khắc Lợi đơs.

Geh ală tŭ tơngai tơrmù ƀà 7%, 11% halà 15% den bol añ kung lơh jat sơl. Bè broă ngui đèng tàm tơngai do den công ty gơsơ̆t ală phan bơna, măy mok ờ gŏ ngui, halà măy mok tàm anih ơn prap mrềt den tơrmù ngui đèng uă ngan rlau jơh, mìng tơl ngui ai jơnau kờñ lơh mrềt phan bơna in lơm. Mờ công ty gam lơh tai dùl anih lơh broă nàng tơnguh tai cồng nha lơh gơlik phan bơna uă rlau 2 dơ̆ pơn ndrờm mờ anih lơh broă đah do dê.

Mpồl lơh sa kă bro tơnguh bơta pràn lơh gơlik plai chi nàng ngui uă ngan rlau jơh khà đèng mat tơngai ơn hơđang rơkàng hìu

Jat ồng Hà Văn Chương, Phó Kuang atbồ Công ty Điện lực Dak Lak đơs, gùt càr tŭ do geh 5 rơbô 339 broă lơh đèng mat tơngai ơn hơ đang rơkàng hìu mờ kờp jơh bơta pràn lơh gơlik mờr 650 rơbôKWp. Tơngai tŭ do, neh geh rlau 400 broă lơh pal tơrmù ƀà pờ tơlik đèng, tài bơh đèng ngui lơyah, khà pờ tơlik đèng jơng kah. Do là ală broă lơh geh bơta pràn lơh gơlik bơh 100KWp rlau hơ đang, geh trạm biến áp is nàng ai đèng tus tàm ală gùng che ồs đèng tờm. Mìng ală broă lơh đèng mat tơngai ơn hơ đang rơkàng hìu geh bơta pràn lơh gơlik ờ pràn, tàm tơrbŏ tơn tàm gùng che ồs đèng ngui pah ngai den ờ gŏ tơrmù đèng ngui ờ. Mblàng bè ƀroă sồr pal tơrmù ƀà pờ đèng bơh dùl ròt broă lơh đèng mat tơngai dê (sùm là koh tơrmù tàm klo ngai- tơngai trồ tơngai uă ngan tàm ngai) ồng Hà Văn Chương đơs loh.

Khà đèng ai bơh đèng mat tơngai geh khà ngui pơgap bơh 20 tus 25% den ală gùng che ồs đeng hơ̆ sồng lơh broă kơ̆ kơl jap. Tŭ gơ sơrlèt uă ir mờ khà hơ̆ den broă kơ̆ kơl jap ală gùng che ồs đèng kal ke ngan. Tài bơh đèng mat tơngai gơguh gơmù sùm jat trồ tơngai, jat ngai- mang mờ geh tŭ là tŭ mhual lòt gan. Den tàng broă koh tơrmù ƀà đèng mat tơngai tàm ală tơngai ngan ngồn là bơta kờñ pal geh uă ngan nàng gàr niam bơta lơh broă kơ̆ kơl jap bơh gùng che ồs đèng dê.

Kung jat jơnau mblàng yal bơh ồng Hà Văn Chương dê, mờ ală broă lơh đèng mat tơngai ơn hơđang rơkàng hìu lơh tàm ală anih lơh broă, suơn dờng gam lơh broă, bulah tơrmù ƀà pờ đèng den cồng nha cèng wơl kung gam niam ngan sơl, tài bơh khi rcang lài ngui geh khà đèng lơh gơlik wơl geh lài. Broă tơrmù ƀà đèng ờ gŏ gơrềng uă tài bơh mìng “koh” bơnah khà đèng tam gơl nisơna tàm klo ngai lơm. Mìng ală broă lơh đèng mat ngai ơn hơđang rơkàng hìu mờ tàm hơ̆ ờ lơh jat broă lơh lơh sa kă bro ngui hoàc huơr đèng, den geh gơmù dùl bơnah priă lơh geh tài bơh ờ gơtùi tăc đèng. Den tàng, cau tờm bơcri priă lơh đèng den pal kờp sền nền jơnau kờñ ngui đèng uă ngan ai broă lơh đèng mat tơngai ơn hơđang rơkàng hìu bơh he dê.

Cau cih Minh Huệ- Cau mbàng K’ Hạnh