VOV4.K’ho- Klo ngai, ngai 09/8, càr Dăk Lăk neh ai mpồl lơh broă lòt wă 478 nă làng bol bơh ƀòn dờng Hồ Chí Minh rê tàm càr nàng pleh kòp. Do là dơ̆ sơnrờp Dăk Lăk lam ai mpồl mut tàm tiah kòp nàng wă làng bol rê.

Mpồl lơh broă lòt wă làng bol rê

 478 nă cau rê dơ̆ do gơwèt ală cau geh ai rê lài, bè: cau kra, kơnòm dềt, cau ùr geh bun, cau ùr gam ròng kòn dềt hơđơm 36 nhai; cau lòt kham kòp, cau lòt còp cau pròc mhàm bal, cau lơh broă ờ hềt gơtùi rê; cau geh dờp geh broă lơh dong kờl mpồl bơtiàn pah nhai; cau pròc mhàm bal lòt bal mờ kơnòm dềt hơđơm 10 sơnam, cau kòp.... geh jơnau kờñ rê wơl tàm tiah ơm kis. Làng bol geh wă rê pal geh sră xét nghiệm mhar kòp Covid-19 cồng nha ờ bơtờp kòp.

 Tập đoàn Phương Trang dong kờl rơndeh mờ priă jền pơn diang nàng wă làng bol rê dơ̆ do

Tơnơ̆ rê tàm càr, làng bol kơnhoàl lơi geh rê ai ơm yah ngài tơrgùm bal tàm kơnhoàl hơ̆ 14 ngai mờ pơn jat tai ai ơm yah ngai is tàm hìu 7 ngai. 22 nơm rơndeh wă làng bol rê dơ̆ do geh Tập đoàn Phương Trang dong kờl jơh priă jền pơn diang rê.

Cau mblàng K’Hạnh