VOV4.K’ho- Ngai 21/7, anih lơh broă cảnh sát lùp khàu Kuang àng ƀòn dờng Buôn Ma Thuột, càr Dak Lak neh geh kơrnuat lah yă broă lơh tìs hình sự “Lơh bơtờp kòp ngòt rơngơt ai kòn bơnus in”. Lài hơ̆, tàm ngai 17/7, Mpồl đơng lam rơcang sơndră kòp Covid-19 càr Dak Lak yal bè broă N.T.H, 36 sơnam, ơm tàm thôn 3, xã Cư Ebur, ƀòn dờng Buôn Ma Thuột, là cau lơh broă văn phòng bơh hìu rơndeh Tiến Oanh dê geh anih tàm hìu sồ 134 gùng Hai Bà Trưng, sơnah ƀòn Thắng Lợi bơtờp mờ kòp Covid-19.

Hìu rơndeh Tiến Oanh gơtìp wang se tài gơ rềng tus cau kòp H

Jat cồng nha lùp khàu bơh sơn rờp anih lơh broă geh gơnoar dê, lài hơ̆ bi H geh mut tàm tiah geh kòp là ƀòn dờng Hồ Chí Minh, mờ tus ngai 10/7 rê wơl ƀòn dờng Buôn Ma Thuột mơya ờ yal bè tiah lòt rê, ờ tam cah is jat jơnau sồr, gam tus uă tiah, ơm rềp mờ uă cau. Tŭ do, Dak Lak neh geh 13 nă cau bơtờp kòp Covid-19 geh bơta dịch tễ gơ rềng tus bi H. Jat tàm broă gơlik geh, anih lơh broă geh gơnoar neh tơl cơng tàng nàng yă broă lơh tìs hình sự “Lơh bơtờp kòp ngòt rơngơt ai kòn bơnus in”.

Cau mblàng K’Duẩn