VOV4.K’ho- Ờ tơl dà ngui sa tàm rài kis gam lơh rài kis bơh mờr 500 hìu bơnhă làng bol tàm xã Dak R’la, kơnhoàl Dak Mil, càr Dak Nông gơtìp sơlơ̆u wơl. Uă hìu bơnhă neh ơpah cau tờ tơrlung dà gĭt nđờ jơ̆t tơlak đong mơya kung ờ jòi geh dà sơl.

Rlau 1 nhai do hìu bơnhă mò Trần Thị Bích Phượng bal mờ uă hìu bơnhă ơm tàm thôn 5, xã Dak R’la pal tă pơgồp bal priă jền pah ngai, blơi gĭt nđờ rơbô lít dà rê tàm pà bal mờ gơ̆p tài bơh ală tơrlung dà tờ ndrờm ờ geh dà lơm. Mò Phượng pà gĭt, bơta ờ tơl dà ngui sa tàm rài kis lơh rài kis bơh làng bol dê gơtìp gơrềng uă ngan. Hìu bơnhă lơi kung pal sồr cau ơm tàm hìu gơn nàng lòt ai dà.

Làng bol tàm do ndrờm ờ tơl dà ngui sa lơm mờ pal lòt blơi dà. Dùl ngai kờp bal bol añ blơi dà sàng kloh ngui tàm rài kis jơh 1 rơbô 500 lít dà, dà pal blơi dilah ờ den ờ  geh dà nàng ngui ờ. Bol añ kơ̆p kờñ ală kấp lơh bè lơi nàng dong kờl halà ai bol hi in dùl bơnah dà sàng kloh nàng làng bol in geh dà ngui nàng làng bol in iang nùs ơm kis.

Làng bol pơgồp priă jền blơi dà ngui sa

Ờ mìng pal blơi dà sàng kloh rê ngui, hìu bơnhă mò Phạm Thị Vân, ơm tàm thôn 3, xã Dak R’la gam ai gĭt nđờ jơ̆t tơlak đong ơpah cau tờ tơrlung dà nàng jòi dà. Mò Vân pà gĭt, hìu bơnhă lơi bơtoah ngan hơ̆ sồng tờ di mờ gùng dà tàm dơlam ù, gam wơl den uă hìu bơnhă tờ jơh gĭt nđờ rơhiang thơk kung ờ geh dà sơl.

Tàm tiah do broă tờ tơrlung dà gơtìp uă ngan kal ke. Hìu bơnhă añ neh tă  40 tơlak đong nàng tờ tơrlung dà jòi dà mơya kal ke ngan. Pal 2 tus 3 ngai hìu bơnhă hơ̆ sồng ƀồm geh dùl sơn tèk dà drơng broă ngui sa pah ngai. Tŭ do, hìu bơnhă añ kung gam pal ai priă jền nàng blơi dà tàm bình rê ngui tàm rài kis pah ngai.

Ndrờm bè hơ̆ sơl, tàm thôn 2 bơh xã do dê tŭ do neh geh 30 hìu bơnhă bơcri priă tờ tơrlung dà nàng ai dà ngui sa, den 28 nơm tơrlung dà ờ geh dà. 3 nơm tơrlung dà geh dà lơgar bơcri priă tờ bơh uă nam lài, kung neh soat dà jơh.

Bàr pe hìu bơnhă làng bol tă is priă tờ tơrlung dà jòi dà ngui

Jat jơnau kờp bơh UBND xã Dak R’la, gùt xã tŭ do geh pơgap 500 hìu bơnhă, mờ rlau 1 rơbô 500 nă cau gam ờ tơl dà ngui sa tàm rài kis pah ngai, uă ngan tơrgùm tàm thôn 2, 3 mờ 5. Ồng Ngô Quang Văn, Phó Chủ tịch UBND xã Dak R’la mblàng yal ală thôn tàm xã ndrờm geh ù tiah jơnhoa, ơm ngài mờ tiah geh dà. Tàm tŭ hơ̆, jơh ală xã mìng geh 1 broă lơh dà sàng kloh ngui bal tàm thôn 7, den ờ gơtùi ai tơl dà.

Tiah do neh hòi jà làng bol bơsong bơta kal ke mờ broă tềm pềr dà, ngui dà di pal. Bè jŏ jòng tàm ù tiah xã Dak R’la dê là ù tiah broă tờ tơrlung dà geh ờ geh cồng nha. Xã neh dan mờ càr geh gùng dà broă lơh jŏ jòng là ƀồm dà sàng kloh tàm bơtơ̆t dà Du Ri 2 tàm thôn 5 mờ crăp trạm ƀồm dà tơnơ̆ UBND xã nàng pơn diang dà tus tàm ală thôn.

Bơta ờ tơl dà ngui tàm rài kis pah ngai tàm kàl prang tàm xã Dak R’la dê jŏ jòng bơh uă nam do. Làng bol kung bè gơnoar atbồ xã kơ̆p kờñ ngan ală kấp, ală gah gờñ dong kờl priă jền lơh nàng làng bol tàm ù tiah do dê geh dà ngui sa, tuh dà ai phan tam in.

Cau cih Tuấn Anh- Cau mblàng K’ Hạnh