VOV4.K’ho- Bulah gơtìp gơrềng tài bơh kòp Kovid-19 mơya 11 mpồl broă jàu lơh sa- mpồl bơtiàn bơh càr Dăk Nông dê ndrờm lơh geh mờ sơrlèt broă jàu broă rơndăp lơh neh sồr lơh. Jơnau do geh yal tàm “Pơrjum tơn jơh broă lơh nam 2021, jàu broă rơndăp lơh, kờp dŭ is mờ lam lơh jăt kơnòl broă nam 2022” bơh Ủy ƀan Ñân zân càr bơyai lơh tàm mho ngai 16/12.

Jăt jơnau yal bơh Ủy ƀan Ñân zân càr Dăk Nông dê, tàm nam 2021, khà gơguh GDP bơh càr dê lơh geh 8,63%, ơm dơ̆ 7 tàm 63 càr mờ ƀòn dờng tàm gùt lơgar; priă lơh geh kờp bal dùl nă cau geh 52 tơlak 100 rbô đong dùl nă cau tàm dùl nam. Tă dia dà lơgar geh rlau 3 rbô 100 tơmàn đong, sơrlèt kờp dŭ lài càr dê jàu.

Kờp jơh broă rơndăp lơh priă bơcri dà lơgar dê nam 2021 bơh càr dê là mờr 2 rbô 117 tơmàn đong, khà ai priă geh mờr 98% broă rơndăp lơh...Bè broă rơndăp lơh bơtàu tơnguh lơh sa- mpồl bơtiàn nam 2022, Dăk Nông kờp dŭ gàr khà gơguh GDP geh 7,5%; tă dia dà lơgar geh rlau 3 rbô tơmàn đong; khà hìu bơnhă rƀah bơh càr dê gơmù ơm tàm khà rlau 3%, tiah làng bol jơi bơtiàn kòn cau dùl êt nă cau lơh geh 5% rlau hơđang.

Cau mblàng Lơ Mu K’Yến