VOV4.K’ho- Tus tŭ do, gùt càr Dăk Nông neh bơtàu tơnguh geh 230 hợp tác xã, mờ rlau 18 rbô nă cau geh jơng. Jat jơnau đơs bơh Ủy ban Nhân dân càr Dăk Nông dê, ală hợp tác xã neh tam gơl broă lơh jat Adat hợp tác xã nam 2012 ndrờm geh bơta tam gơl pa, ngai sơlơ rề ơnàng mờ bơtàu tơnguh, pơgồp bơnah tam gơl muh mat ƀòn lơgar.

Tiêu hữu cơ bơh Hợp tác xã Hoàng Nguyên Dăk Song dê tac tus drà kă bro châu Âu git nđờ rhiang tấn pah nam

Nam 2021, priă lơh geh kờp bal bơh ală hợp tác xã tàm càr Dăk Nông dê geh mờr 1 tơmàn 500 tơlak đong, ai geh broă lơh sùm mờr 4 rbô nă cau lơh broă in, mờ priă lơh geh kờp bal 70 tơlak đong dùl nă cau. Kuơmàng tàm gah lơh sa suơn sre, ală hợp tác xã gam là gah tờm tàm broă ai tơlik lài gùng dà bơt bơtàu ală tiah lơh sa suơn sre ngui công nghệ cao bơh càr dê, tàm tơrbŏ bal tơgùm cau lơh broă sa lơh broă jat ròt bơta kuơ lơh geh. Càr neh bơt bơtàu 8 tiah lơh sa suơn sre ngui công nghệ cao; neh geh 12 phan bơna bơh ală hợp tác xã tơl khà bơh 3 tus 4 sơmañ tàm broă lơh tơl xã dùl phan bơna (OCOP), geh tac tus ală drà kă bro dờng bè châu Âu.

Cau mblàng K’Duẩn