VOV4.K’ho- Ủy ban tĕ khà càr Dak Nông neh geh sră yal sồ 69 pơyoa Mpồl duh broă tĕ khà dà lơgar in bè broă dan tĕ khà Kuang bàng Quốc hội khóa 14 mờ Kuang bàng Hội đồng Nhân dân ală kấp tơngai lơh broă bơh nam 2021- 2026 gờñ 1 ngai pơndrờm mờ jơnau sồr tàm bàr pe mpồl ling sền gàr tiah nhàr lơgar dê.

Jat Ủy ban Tĕ khà càr Dak Nông, tơngai pa do tàm gơl gùng tiah nhàr lơgar Việt Nam mờ Campuchia geh uă bơta pơhìn kal ke ờ gơtùi gĭt lài bè bơta kòp Covid-19. Tŭ do, Kuang bàng, cau ling mpồl ling sền gàr tiah nhàr lơgar càr Dak Nông gam tơrgùm lơh jat kơnòl broă dơ̆ lĕ bal, sền gàr tiah nhàr lơgar mơkung rcang sơn dră kòp Covid-19. Jat tàm Bơta 72, Adat Tĕ khà Kuang bàng Quốc hội mờ Hội đồng Nhân dân dê, nàng kờñ sền gàr kơ̆ kơl jap gơnoar tờm sền gàr bơta lơngap lơngai tiah nhàr lơgar bơh dà lơgar mờ rcang sơn dră kòp Covid-19, Ủy ban tĕ khà càr Dak Nông dan mờ Mpồl duh broă tĕ khà dà lơgar ai gơnoar tĕ khà gờñ 1 ngai tàm 12 pôs đồng ling sền gàr tiah nhàr lơgar mờ Tiểu đoàn pơlam tàp cơ động 19 (Gah đơng lam Mpồl ling sền gàr tiah nhàr lơgar càr dê).

 Cau mblàng K’ Hạnh