VOV4.K’ho- Tềng đap bơta gơrềng bơh kòp Covid-19 dê, gah lơh sa suơn sre càr Dăk Nông neh crơng gơs mpồl dong kờl, tàm tơrbŏ bal dong làng bol tăc ală phan lơh geh bơh suơn sre tàm ù tiah càr dê. Mpồl dong kờl, tàm tơrbŏ bal tăc phan lơh geh bơh suơn sre gơwèt Sở Nông nghiệp mờ Phát triển Nông thôn càr Dăk Nông dê geh 15 nă cau. Mpồl geh kơnòl broă lam lơh, pơgồp bal mờ ală kơnhoàl, ƀòn dờng di tŭ tă bơsong ală bơta kal ke kòl yan nàng dong kờl tơnguh broă lơh sa mờ tăc phan lơh geh bơh suơn sre gàr niam broă lơh ƀuơn ngan, ờ do ờdă rcang sơndră kòp Covid-19.

Cau lơh suơn tam sầu riêng tàm Dăk Nông geh tàm tơrbŏ bal tăc phan lơh geh bơh suơn sre

Ngan ngồn Mpồl geh tơrgùm sră cih mat, gĭt loh di tŭ ală bơta kal ke, kòl yan mờ ală jơnau đơs, jơnau dan bơh cau lơh suơn, anih blơi phan lơh geh bơh suơn sre dê. Mờ kung tơrgùm wơl jơnau đơs, bơt bơtàu ală gùng dà broă lơh tàm tơrbŏ bal cau lơh broă sa mờ ală hìu măy lơh gơlik phan lơh geh bơh suơn sre, mpồl lơh sa kă bro, anih blơi phan, siêu thị. Tàm càr Dăk Nông, tŭ do bơ mờ sầu riêng là 2 bơta plai chi geh bă ù tam uă ngan rlau jơh gam tàm tơngai tơn hào, mơya tài gơrềng bơh kòp dê den broă tăc phan gam gơtìp uă ngan kal ke.

Cau mblàng K’Hạnh