VOV4.K’ho- Mho ngai 15/7/2021, càr Dak Nông geh cau dơ̆ 5 bơtờp kòp Covid-19 là cau măi rơndeh kong goa lòt gan ù tiah càr. Cau kòp cau klau sồ 40924 là V.H.L.E, deh nam 1991, ơm kis tàm thôn Mỹ Long, xã Mỹ An, kơnhoàl Chợ Mới, càr An Giang.

Tŭ lòt gan càr Dak Nông, cau do dan ai mẫu lơh xét nghiệm mờ broă xét nghiệm mhar mờ ai cồng nha bơtờp virus Sars CoV-2 tŭ 9 jơ 15 phuk drim ngai 15/7/2021. Cau kòp do mhar geh gah lơh sơnơm ai mẫu pơyua Anih tờm gròi sền kòp tê jê să càr in xét nghiệm mờ kỹ thuật RT-PCR mờ ai cồng nha bơtờp kòp tŭ 4 jơ 45 phuk mho dùl ngai bal. Cau kòp neh geh jun mờ rơndeh sơnơm tus anih tam cah is sơm kòp Covid-19 bơh càr dê. Tơnơ̆ tŭ geh cau kòp, mpồl lơh broă geh gơnoar neh jòi bàn 4 nă cau ơm rềp mờ gam tam cah is ai mẫu kòp nàng lơh xét nghiệm. Bal mờ hơ̆, gah lơh sơnơm lam lơh ƀồm sơnơm lơh kloh khuẩn jơh tiah anih gròi sền Cai Chanh mờ tiah lơh xét nghiệm mhar bơh Hìu sơnơm kơnhoàl Dak Rlâp dê.

Cau mblàng K’Duẩn