VOV4.K’ho- Mho ngai 14/7, tàm Kuang àng càr Dak Nông, Bộ Kuang àng neh bơyai lơh yal Kơrnuat bơh Bộ trưởng Bộ Kuang àng dê bè broă lơh kuang bàng. Tàm dơ̆ bơyai lơh, Trung tướng Trần Quốc Tỏ, Thứ trưởng Bộ Kuang àng neh jàu kơrnuat bơh Bộ trưởng Bộ Kuang àng dê tàm pơ dờn Đại tá Bùi Quang Thanh, Phó Kuang atbồ Kuang àng càr Quảng Bình lơh Kuang atbồ Kuang àng càr Dak Nông.

Đại tá Bùi Quang Thanh đơs dờp kơnòl broă

Đơs tàm dơ̆ bơyai lơh, Trung tướng Trần Quốc Tỏ pin dờn tàm gơnoar broă pa, anih lơh broă pa, Kuang atbồ pa Kuang àng càr Dak Nông ồng Bùi Quang Thanh geh mhar git ù tiah, broă lơh, mhar gơ gờm bal mờ mpồl Đảng ủy, Mpồl atbồ kuang àng càr nàng đơng lam, pơlam mpồl Kuang àng càr Dak Nông lơh gơs jak ngan tơl kơnòl broă geh jàu, lơh gơlik anih kơ̆ kơljap, drơng kơnòl broă bơtàu tơnguh lơh sa, mpồl bơtiàn bơh càr Dak Nông dê in.

Cau mblàng K’Duẩn