VOV4.K’ho- Cau tam pơ ò tàm kơnhoàl Dak Mil, càr Dak Nông gam ờ suk ngan tài bơh git nđờ rhiang lồ pơ ò tus kàl tơnhàu mơya ờ geh cau blơi. Gơ wèt mờ ală sươn chi neh tơnhàu, neh geh git nđờ rhiang tấn pơ ò pal tuh sang.

Bi Phạm Công Văn ơm tàm thôn Tân Lập, xã Dak Gằn geh mờr 2 lồ ù tam ală bơta pơ ò tac hờ lơgar ndai. Nam lài, bơh suơn do bi geh priă cồng rlau 200 tơlak đông. Ai nam do, bơh bồ kàl tus tŭ do, hìu bơnhă mìng tac geh mờr 100 tơlak đông, tơl priă nàng tơm priă blơi phơng sih gời, ờ geh cồng. Jơh khà pơ ò gam wơl tŭ do pal pic tuh sang: “Khà priă tŭ do gơmù lơyah ngan, gơmù lơyah ngan rlau jơh bơh tŭ añ tam pơ ò tus tŭ do. Pơ ò tac hờ lơgar ndai mìng gam bơh 3 rbô tus 3 rbô 500 đông tàm 1 kĭ. Ai pơ ò tac tàm lơgar mìng gam 500 đông dùl kĭ, bè pơ ò 3 kàl ờ geh cau blơi sền bè sang tĕ jơh tơn. Hìu lơi pơ ò ờ niam den mìng tac geh 500 đông dùl kĭ, kờp jơh den kung ờ tơl priă ơpah cau pic sơl. Uă hìu bơnhă khin lời gơ in jrùh halà klah ntê pơ ò 3 kàl sang jơh tàm ù nàng lơh phơng vi sinh”.

                               Rlau 10 tấn pơ ò 3 kàl hìu bơnhă bi Phạm Công Văn  dê pal sang tĕ

Ndrờm bè hơ̆ sơl, hìu bơnhă mò Lê Thị Tư geh rlau 1 lồ 2 sàu pơ ò kung ờ gơtùi tac lơh hìu bơnhă gơtìp hoàc huơr kơn jơ̆ ngan. Mò Tư pà git, tŭ do suơn pơ ò mìng rơp pa tac geh dùl êt mơya khà priă lơyah ngan. Tac 1 tạ plai pơ ò kung ờ hềt tơl nàng tơm priă ơpah cau pic sơl. Bulah hoàc huơr mơya hìu bơnhă kung pal leng càn priă nàng gàr suơn chi: “Hìu añ dê tŭ do geh pơgap bơh 5 tus 6 tấn ờ tac geh dùl đông tơn pal sang tĕ tài ờ geh cau blơi. Suơn pơ ò do, añ bơcri priă dùl nam mờr 70 tơlak đông mơya tŭ do pal sơngka sền gàr, ơn phơng, ƀồm sơnơm wil tơl nàng tờm pơ ò in tơt plai kàl tơnơ̆. Khà priă nam do bal mờ kòp bơtờp tai den tàng pơ ò ờ gơtùi yac, geh hìu ờ tơl priă nàng tơm priă tă lơh sơl”.

                                                   Suơn pơ ò mò Lê Thị Tư dê ờ geh cau blơi

Jat tơrgùm kờp bơh xã Dak Gằn dê, tŭ do gùt xã geh mờr 1 rbô lồ pơ ò ală bơta. Tàm hơ̆, geh mờr 700 lồ gam tơnhàu, cồng nha kờp bal geh 15 tấn tus 20 tấn tàm 1 lồ 1 kàl. Ồng Đỗ Viết Hạnh, Phó Chủ tịch Ủy ban Nhân dân xã Dak Gằn pà git, tài gơ rềng bơh kòp Covid-19, uă ngan cau tờm suơn mìng rơp pa tac geh rlau nggùl bal mờ khà priă lơyah ngan, gam wơl pal sang tĕ tài bơh ờ geh cau blơi mờ khà priă lơyah ir: “Bè broă lơh, xã neh geh jơnau dan mờ ală anih lơh broă geh gơnoar hòi jà ală mpồl lơh sa kă bro lơh gơlik uă bè chi sa plai, nàng hời rơhời lòt sền, wèt tus bơcri priă. Xã hòi jà làng bol lơh ngan sơngka sền gàr, gàr suơn chi ai ală nam tơnơ̆ in. Bal mờ hơ̆ bol hi kung geh jơnau dan mờ anih lơh broă dà lơgar, ngân hàng geh broă lơh tơn jŏ tơngai tơm dồs halà tơrmù priă cồng ai càn gơ wèt tus mờ cau tam pơ ò nàng tơrmù ƀà hoàc huơr, bơta aniai”.

Cau mblàng K’Duẩn