VOV4.K’ho- Dơ̆ pơrlòng jơh bơsram kấp pe nam 2021, càr Dak Nông geh 7 rơbô nă cau pơr lòng tus bal. Bal mờ rơndap tai ală anih pơrlòng, cơldŭ pơrlòng, Sở Giáo dục mờ Đào tạo càr Dak Nông hòi jà mờr 1 rơbô nă cau lơh kơnòl broă sền pơrlòng. Tàm hơ̆ geh Kuang bàng, cau lơh broă ală gah: bơto bơtê, ling klàng, kuang àng mờ gah lơh sơnơm mut lơh bal. Tŭ do, gah bơto bơtê neh yal bè kơrnoat lơh broă, pơlam tàp ai kuang bàng, cau pơgru, cau tus bal drơng broă tàm dơ̆ pơrlòng. Ală cau tus bal pơrlòng geh ai tơl bơta niam ngan rlau jơh bè anih pơrlòng nàng tềm pềr tŭ jiơ lòt rê, pleh mờ broă lòt ngài.

Dak Nông bơto pơlam sền pơrlòng jơh bơsram kấp pe

Tàm ală anih pơrlòng, broă lơh kờp sền, bơtơl ală bơta ờ hềt tơl, lơh niam wơl ală bơta ờ diơng geh gah bơto bơtê lơh ngan mut lơh, gàr niam ală jơnau sồr bè geh tơl bơta phan bơna, gàr niam bơta lơngap lơngai, rơndap tap sèng bơyai lơh dơ̆ pơrlòng in. Kuơ màng, tềng đap bơta kòp Covid-19 gam gơlik geh kal ke, Sở Giáo dục mờ Đào tạo càr Dak Nông neh sồr ală hìu bơsram atbồ niam kơnòm bơsram tus bal pơrlòng jơh bơsram kấp pe, tơngkah ală kơnòm bơsram mờ mè bèp cau kơnòm bơsram dê bañ lik bơh càr, ngan là tus ală tiah geh kòp.

Cau mblàng K'Hạnh