VOV4.K’ho- Càr Dăk Nông neh tam gơl ờ huan lơh kràñ tai jơnau sồr ơm yah ngài mpồl bơtiàn tàm uă tiah bè lơh jăt Chỉ thị sồ 19, pờ wơl jơh ală broă lơh kă bro, drơng broă tàm tiah do. Jăt sră nggal geh Ủy ban Nhân dân càr Dăk Nông ai lơh jăt tàm ngai 23/09, bòn dờng Gia Nghĩa mờ 5 kơnhoàl: Tuy Đức, Dăk Glong, Dăk Song, Krông Nô, Cư Jŭt, tam gơl bơh Chỉ thị sồ 15 tus Chỉ thị sồ 19.

Mìng is kơnhoàl Dăk R’lấp kung gam lơh jăt sơl Chỉ thị sồ 15 mờ kơnhoàl Dăk Mil pơn jăt tai lơh jăt Chỉ thị sồ 16. Tàm ală tiah tam gơl lơh jăt Chỉ thị sồ 19, Ủy ban Nhân dân càr Dăk Nông ai gơnoar pờ wơl mpồng ală hìu ñô sa, hìu năc, hìu tăc phan sa; ală broă lơh tă bro, tăc phan rah rài mờ lơh wơl drơng broă pơndiang năc lòt rê mờ ală càr. Jơnau sồr gơwèt mờ ală anih kă bro drơng broă là tŭ lơh broă wơl, pal lơh jăt niam ală broă lơh rơcăng sơndră kòp Covid-19 jăt jơnau sồr bơh Bộ Y tế dê. Hơ̆ là, ờ gŏ di tơrgùm uă rlau ir 30 nă cau tàm tiah mpồl bơtiàn, bơdìh anih lơh broă, hìu sơnơm, hìu bơsram. Kờp tus ngai 23/09, càr Dăk Nông geh 697 nă cau bơtờp kòp Covid-19, tàm hơ̆ geh 253 nă cau kòp geh sơm bời kòp mờ rê bơh hìu sơnơm.

Cau mblàng Lơ Mu K’Yến