VOV4.K’ho- Ngai 28/4, Đại tá Nguyễn Văn Lư, Kuang atbồ Gah đơng lam mpồl ling sền gàr tiah nhàr dà lơgar càr Dak Nông pà git, Pôs ling sền gàr tiah nhàr dà lơgar Dak Tiên, kơnhoàl Dak Song pa git gŏ, kup 2 nă cau dô gan tiah nhàr dà lơgar tìs mờ adat boh lam tàm tiah nhàr đah Việt Nam mờ Campuchia.

Kup bàn 2 nă cau dô gan tiah nhàr dà lơgar tìs mờ adat boh lam

Pơgap 10 jơ ngai 27/4, tàm jrong tồt 52/3, tŭ lòt sền, sền gàr tiah nhàr dà lơgar, ală cau ling pôs ling sền gàr tiah nhàr dà lơgar Dak Tiên git gŏ 2 nă cau geh Lê Văn Biều mờ Lê Sơn Điền ndrờm geh hộ khẩu ơm kis sùm tàm xã Thuận Hạnh, kơnhoàl Dak Song gam geh broă lơh dô gan tiah nhàr dà lơgar tìs mờ adat boh lam nàng ting mòc phan brê. Mpồl ling sền gàr tiah nhàr dà lơgar neh lơh sră mờ jàu ală cau do ai Hìu sơnơm kơnhoàl Dak Song in lam lòt tam cah is 14 ngai jat jơnau sồr, mờ kung sồr kuang àng kơnhoàl Dak Song lah yă tìs hình sự jat jơnau cih bơh adat boh lam dê.

Cau mblàng K’Duẩn