VOV4.K’ho- Dơ̆ lam lơh “Lòt bal mờ cau ùr tiah nhàr dà lơgar” tơngai bơh nam 2021 tus nam 2025 geh Mpồl tam klac cau ùr càr Dak Nông mờ gah đơng lam mpồl ling sền gàr tiah nhàr dà lơgar pơgồp bal bơyai lơh tàm drim ngai 31/3, tàm xã Thuận Hạnh, kơnhoàl Dak Song.

Lam lơh broă lơh do tàm tơngai bơh nam 2018 tus nam 2020, Mpồl tam klac cau ùr càr Dak Nông mờ gah đơng lam mpồl ling sền gàr tiah nhàr dà lơgar càr neh lam lơh uă broă lơh sền gàr pràn kơldang să jan, gàr tơl niam rài kis mpồl bơtiàn, dong kờl tơn jơh jơgloh tơrmù rƀah, bơtàu tơnguh lơh sa ai cau ùr ală jơi bơtiàn kòn cau tiah nhàr dà lơgar in. Ală mpồl neh pơgồp bal bơyai lơh 30 dơ̆ mblàng yal, bơ to bơtê adat boh lam; dờp dong kờl mờ lam lơh broă lơh “Dong oh tus hìu bơsram”...

Đơs tàm dơ̆ bơyai lơh, mò H’Vi Êban, Chủ tịch Mpồl tam klac cau ùr càr Dak Nông hòi jà jơh gùt kuang bàng, cau ling, cau tàm mpồl cau ùr pơn jat tai gàr sùm mờ bơt bơtàu ală broă lơh sa kơ̆ kơljap ai cau ùr rƀah tàm ală xã tiah nhàr dà lơgar in.

Cau mblàng K’Duẩn