VOV4.K’ho- Kờp tus ngai 13/7, càr Dak Nông neh geh 3 nă cau bơtờp kòp Covid-19. Tềng đap bơta kòp Covid-19 gơlik geh kal ke, ờ gơtùi git lài, jơnau pơhìn bơtờp uă kòp tàm uă tiah, càr Dak Nông neh lơh jat broă ơm yah ngài mpồl bơtiàn jơh gùt càr jat Jơnau sồr sồ 15 bơh Thủ tướng Chính phủ dê sơn đờm bơh 12 jơ klo ngai ngai 13/7 tus tŭ geh jơnau yal pa.

Jat hơ̆, càr Dak Nông geh ơm ală broă lơh tơrgùm gal cau bơh 20 nă cau rlau hơđang. Ờ tơrgùm bơh 10 nă cau rlau hơđang bơdìh anih lơh broă, hìu bơsram, hìu sơnơm; sồr ơm yah ngài êt ngan rlau jơh 2 thơk tàm tiah geh gal cau. Tơrmù rơndeh rơndồ lòt tàm gùng, khà cau đì tàm ală rơndeh pơndiang nac tàm càr. Sồr tơrmù khà cau lơh broă tàm anih lơh broă, sơlơ tơnguh lơh broă pờ tơn tàm internet. Gơ wèt mờ cau bơh ƀòn dờng Hồ Chí Minh (tŭ do gam ơm yah ngài jat Jơnau sồr sồ 16 bơh Thủ tướng Chính phủ dê) rê halà tus tàm càr sen sồr pal ai mẫu xét nghiệm Realtime PCR tàm ală anih sền gròi kòp, tam cah is tơrgùm bal tus tŭ geh cồng nha xét nghiệm ờ bơtờp kòp den tam cah is tàm hìu mờ xét nghiệm Realtime PCR jat jơnau sồr bơh Bộ Y tế dê.

Cau mblàng K’Duẩn