VOV4.K’ho- Nàng kờñ gàr niam lơngăp lơngai chính trị, rơndăp tăp sèng ờdo ờdă jơh gùt mpồl bơtiàn di dơ̆ tĕ khà Quốc hội khoá XV mờ Hội đồng Nhân dân ală kấp tơngai lơh broă bơh nam 2021- 2026, Kuang àng càr Dăk Nông neh geh broă rơndăp lơh mờ gam lam lơh dùl ròt bal ală broă lơh sền gàr bơta lơngăp lơngai.

Jăt mờ hơ̆, Kuang àng càr Dăk Nông neh ai tai mpồl cau tus kơnă hơđơm rơcăng lài lùp gĭt jơnau gơlik geh, lam lơh ală broă lơh gơwèt broă lơh ờs mờng, mblàng yal, hòi jà làng bol lơh jăt niam gùng dà broă lơh Đảng dê, kơrnoat boh lam Dà lơgar dê, jơh nùs tus bal lòt tĕ khà; di tŭ sền gŏ mờ tam dră wơl, kơryan jơh ală jơnau jòi kai lơh broă bơh ală mpồl cau gơjrañ kơuềng dê nàng kờñ lơh aniai dơ̆ tĕ khà Quốc hội khoá XV mờ Hội đồng Nhân dân ală kấp. Kuang àng ală tiah neh lơh ală dơ̆ lơh uă lòt jòi kŭp kơryan cau lơh tìs glài kŭp jàm, lơh sa, ma túy, sơlơ tơnguh tai broă lơh ătbồ sră pơ àr bè rơndăp tăp sèng ờdo ờdă jơh gùt mpồl bơtiàn, sùm lòt sền sră cih mat cau tàm hìu bơnhă, broă lơh ơm kis ing, ờ geh măt ing.

Cau mblàng Lơ Mu K’Yến