VOV4.K’ho- Jăt Ủy ban Mặt trận dà lơgar Việt Nam càr Dăk Nông yal, tus jơh ngai 12/4 pa do, ală tiah tàm càr neh lơh sir jơh broă ai jơnau đơs, bơta pin dờn bơh cau tĕ khà dê tàm tiah ơm kis gơwèt mờ cau tơlik măt tĕ khà Kuang bàng Quốc hội khoá XV mờ kuang bàng Hội đồng Nhân dân ală kấp, tơngai lơh broă bơh nam 2021- 2026.

Jăt cồng nha bơh Ủy ban Mặt trận dà lơgar Việt Nam ală kơnhoàl, ƀòn dờng dê yal, 11 nă cau tơlik măt tĕ khà kuang bàng Quốc hội khoá XV, 96 nă cau tơlik măt tĕ khà kuang bàng Hội đồng Nhân dân càr khoá IV mờ ală cau tơlik măt tĕ khà kuang bàng Hội đồng Nhân dân ală kấp tơngai lơh broă bơh nam 2021- 2026 tàm càr Dăk Nông ndrờm dờp geh 100% bơta pin dờn bơh cau tĕ khà dê tàm tiah ơm kis.

Ală dơ̆ bơyai lơh ai jơnau đơs, bơta pin dờn bơh cau tĕ khà dê tàm tiah ơm kis neh geh lơh duh hồl, làng bol lơh tờm, loh làng song dơ pă, lơh jăt di broă bơto pơlam mờ di jơnau sồr. Tŭ do, ală kơnhoàl, sơnah ƀòn, xã tàm ù tiah càr dê gam lơh sră cih măt mờ lir mat, yal dùl êt rài kis hìu bơnhă mờ broă lơh bơh cau tơlik măt tĕ khà dê tàm anih duh broă dà lơgar mờ ală tiah đùh sră.

 Cau mblàng Lơ Mu K’Yến