VOV4.K’ho- Mpồl lơh broă geh gơnoar càr Dăk Nông neh lơh broă wàng se dùl hìu bơsram mờ uă tiah geh gơrềng tus kơnhoàl Dăk R’lấp, tơnơ̆ tŭ sền gŏ dùl nă kơnòm bơsram bơtờp mờ virus Sars CoV-2. Mờ gah lơh sơnơm kung sơr băc mhar ai mẫu xét nghiệm mhar tam cah is ală cau F0 lik bơh mpồl bơtiàn.

Jat jơnau yal bơh Mpồl đơng lam rcang sơndră kòp càr Dăk Nông dê, tơnơ̆ tŭ sền gŏ dùl nă kơnòm bơsram Hìu bơsram Dân tộc nội trú kơnhoàl Dăk R’lấp, ơm tàm ƀòn Bù Bir, xã Quảng Tín, kơnhoàl Dăk R’lấp bơtờp mờ virus Sars CoV-2, mpồl lơh broă geh gơnoar neh mhar cang tiah kơryan kòp, jòi gĭt tiah lòt rê, ai mẫu xét nghiệm. Tŭ do, gah lơh sơnơm neh jòi gĭt tiah lòt rê geh rlau 150 nă cau F1, rlau 100 nă cau F2 mờ tŭ do neh geh 15 nă cau ai cồng nha xét nghiệm RT-PCR bơtờp mờ virus Sars CoV-2. UBND kơnhoàl Dăk R’lấp geh kơrnoat ai ơm yah ngài jat Chỉ thị sồ 16 gơwèt mờ jơh gùt ù tiah xã Quảng Tín dê.

Cau mblàng K’Hạnh