VOV4.K’ho- Ngai 04/5, Ủy ban Nhân dân càr Dak Nông neh geh sră nggal sồr bè broă ơm ing broă lơh bàr pe broă drơng ala nàng lơh jat niam ală broă lơh rcang sơndră kòp Covid-19. Jat hơ̆, bơh mang ngai 04/5, bàr pe broă drơng ala ờ ngan ngồn kuơ màng bè quán bar, karaoke, tam ya, nhơl điện tử geh bơta pơhìn bơtờp uă kòp Covid-19 tàm ù tiah càr dê, sồr pal ơm ing lơh broă. Ủy ban Nhân dân càr sồr ală gah sơnah lơh broă, ală tiah ờ bơyai lơh ală broă lơh tơrgùm uă cau ờ kuơ màng, lơh jat niam ală broă lơh rcang lài jat di mờ jơnau sồr. Tŭ do, Dak Nông ờ hềt geh cau lơi bơtờp kòp Covid-19 mờ bơta kòp tàm ù tiah càr dê sền bal là geh sền gròi niam. Kờp tus jơh ngai 03/5, gùt càr gam geh 31 nă cau ai ơm yah ngài mờ jat sền.

Tàm càr Mondulkiri (lơgar Campuchia) geh gùng nhàr bal mờ càr Dak Nông neh geh 3 nă cau bơtờp kòp Covid-19 tàm mpồl bơtiàn den bơta pơhìn bơtờp kòp bơh mpồng tiah nhàr lơgar mut tàm ù tiah càr dê là uă ngan.

Cau mblàng K’ Hạnh