VOV4.K’ho- Nam bơsram 2021- 2022, nàng dong kờl ală kơnòm bơsram geh rài kis kal ke tus hìu bơsram, gah bơto bơsram càr Dăk Nông neh lam lơh broă pà sră măi, sră cih mờ dong kờl priă tă bơsram sră ai rlau 22 rbô nă kơnòm bơsram ală kấp in. Jat hơ̆, nam bơsram 2021- 2022, càr Dăk Nông geh 22 rbô 400 nă kơnòm bơsram cau jơi bơtiàn kòn cau dùl êt nă cau gơ wèt hìu bơnhă rƀah, ndrờm bè cau rƀah geh pà sră măi, sră cih ờ sa priă; tàm hơ̆ geh 14 rbô 300 nă kơnòm bơsram kấp 1, rlau 6 rbô 900 nă kơnòm bơsram kấp 2 mờ 1 rbô 200 nă kơnòm bơsram kấp 3.

Mùl màl, tơl nă oh geh dờp dùl bộ sră măi mờ sră cih bơh 14 tus 24 pang, gơ jat tàm kấp bơsram. Kờp jơh priă tă lơh broă do là mờr 11 tơmàn đông, ai bơh kes priă càr. Bal mờ hơ̆, Dăk Nông kung neh hòi jà ală mpồl cau, cau dùl nă să bal mờ làng bol tàm càr tă pơgồp priă jền, sră măi, sră cih, àu mpha nàng dong kờl ală kơnòm bơsram geh rài kis kal ke, kơnòm bơsram kòn đời geh tai bơta nàng lòt bơsram.

Cau mblàng K’Duẩn