VOV4.K’ho- Lơh jat srơh “Jơh gùt làng bol tus bal rơcang sơndră kòp Covid-19 mờ lik lòt hờ lơgar ndai, mut tàm lơgar he tìs mờ adat boh lam” tàm tiah nhàr dà lơgar, ală pôs ling bơh mpồl ling sền gàr tiah nhàr dà lơgar càr Dak Nông neh pơgồp bal mờ càr Dak Nông bơyai lơh lam lơh, mblàng yal, hòi jà rlau 1 rbô hìu bơnhă làng bol ơm kis tàm tiah nhàr dà lơgar càr kĭ jơnau hơ pơrgon lơh jat ală broă lơh rơcang sơndră kòp Covid-19 mờ lik lòt hờ lơgar ndai, mut tàm lơgar he tìs mờ adat boh lam.

Bal mờ bơta cih mat is hơ pơrgon lơh jat nền nòn ală broă lơh rơcang sơndră kòp bơtờp jat jơnau sồr bơh gơnoar atbồ càr dê, tŭ git gŏ cau lik lòt hờ lơgar ndai, mut tàm lơgar he tìs mờ adat boh lam halà bơh tàm tiah geh kòp rê wơl, làng bol yal mơ ală kấp gơnoar atbồ, mpồl ling sền gàr tiah nhàr dà lơgar in git. Làng bol jơh nùs lơh jat “3 ờ”: ờ lòt hờ lơgar ndai, mut tàm lơgar he tìs mờ adat boh lam; ờ mpồn, dong cau lik lòt hờ lơgar ndai, mut tàm lơgar he tìs mờ adat boh lam; ờ bơyai lơh jun, rò, lơh kòn gùng dong cau lik lòt hờ lơgar ndai, mut tàm lơgar he tìs mờ adat boh lam.

Cau mblàng K’Duẩn