VOV4.K’ho- Càr Dăk Nông tŭ do geh mờr 11 rbô lồ ù tam biăp, kơnuh, plai, chi sa plai ală bơta, mờ kờp jơh phan lơh geh pơgăp 176 rbô tấn. Jăt tơrgùm kờp bơh gah lơh broă sa sươn sre càr dê bơh tŭ do tus nhai 11 geh pơgăp 43 rbô tấn biăp, kơnuh, plai, sầu riêng mờ ƀơ bơh làng bol dê kờñ tăc bro, kờp dŭ pơgăp 900 tấn pah ngai.

           Neh geh rơlao 4 rơbô tấn plai sầu riêng geh gah lơh sa suơn sre càr Dăk Nông pơgồp bal tăc

Mơya, tài bơh gơrềng bơh kòp Covid-19 den tàng broă tăc phan lơh geh bơh sươn sre bơh làng bol dê tìp uă ngan kal ke. Uă cau lơh sươn kung gam ờ hềt jòi geh sơl drà tăc ai phan lơh geh bơh sươn sre in, cau tơnhàu phan kung ờ gơtùi hòi sơl. Chi cục Bơtàu tơnguh lơh broă sa sươn sre càr Dăk Nông pà gĭt, tŭ do, gah lơh broă sa sươn sre càr dê neh crơng gơs mpồl dong kờl, tàm tơrbŏ dong làng bol tăc ală bơta phan lơh geh bơh sươn sre bơh tiah he dê. Jăt mờ hơ̆, rlau 3 poh do, rlau 4 rbô tấn biăp, kơnuh, plai ală bơta, 4 rbô tấn sầu riêng mờ rlau 3 rbô tấn ƀơ neh geh gah lơh broă sa sươn sre bơh càr dê tàm tơrbŏ tăc bro phan.

Cau mblàng Lơ Mu K’Yến