VOV4.K’ho - Jăt rơndăp broă geh ai, nam 2021 do, càr Dak Nông bơcri 172 tơmàn đong nàng lơh, lơh niam wơl gùng che ồs đèng drơng làng bol in, tàm hơ̆ geh 24 broă lơh pơn jăt tai bơh nam lài, 35 broă lơh pa.

Tus lồi nhai 4, Công ty Điện lực Dak Nông neh bơcri rơlao 14 tơmàn đong. Kờñ chồl mhar broă lơh, Công ty neh sồr ală mpồl lơh broă gơrềng bal pơlam di tŭ broă bơyai lơh sền nàng gĭt, kĭ rơndăp broă lơh, lơh di pal, khà priă pơn jăt tai... tàm ală broă lơh; mờ lơh jăt broă sền gròi nền nòn bơta niam mờ tơngai lơh broă.

Broă rơcang bơ̆t bơtàu rơndăp broă lơh, gờñ ai ală broă lơh nàng geh lơh broă ờ mìng cèng geh cồng nha broă lơh sa mờ gam pơgồp bal tàm broă drơng broă tơnguh bơtaù lơh sa mpồl bơtiàn, tơnguh uă rài kis làng bol càr Dak Nông in.

Cau mblàng Ndong Brawl