VOV4.K’ho- Di tàm ngai sơnđờm mut nam bơsram pa (05/9) pa do, anih lơh broă geh gơnoar càr Dăk Nông sền gŏ 1 nă kơnòm bơsram bơtờp kòp Covid-19. Sở Giáo dục mờ Đào tạo tiah do dê neh ơm ing broă bơyai lơh bơto bơtê mờ bơsram tơn tàm ală hìu bơsram. Mìng is gơwèt mờ Hìu bơsram Dân tộc nội trú bơyai lơh broă lơh ai ală kơnòm bơsram in ơm wơl tàm hìu bơsram mờ pal atbồ kràñ ngan kơnòm bơsram. Tàm kơnhoàl Dăk R’lấp, tơngai pa do, gơnoar atbồ mờ gah lơh broă geh gơnoar neh geh uă broă lơh dong kờl, pơndờm pơnđiang kơnòm bơsram mờ cau pơgru tàm tiah kòp.

Tơnơ̆ tŭ sền gŏ dùl nă kơnòm bơsram bơtờp mờ virus Sars CoV-2 tàm ngai 05/9, rlau 220 nă kơnòm bơsram mờ cau pơgru Hìu bơsram Dân tộc nội trú kơnhoàl Dăk R’lấp, càr Dăk Nông neh lơh jat broă ai ơm yah ngài tàm hìu bơsram tơn nàng rcang sơndră kòp Covid-19. Ồng Nguyễn Văn Nam, Hiệu trưởng Hìu bơsram Phổ thông Dân tộc nội trú Trung học Cơ sở mờ Trung học Phổ thông kơnhoàl Dăk R’Lấp, càr Dăk Nông pà gĭt, pah ngai hìu bơsram ndrờm pơgồp bal mờ mpồl lơh sơnơm đo was să jan mờ yal mhar bơta pràn să jan bơh ală kơnòm bơsram mờ cau pơgru dê.  

Bè đah Kuang bàng, công nhân viên, tiah sa, tiah ơm rlô bĭc tàm hìu bơsram neh rơndap bàr pe cơdŭ lơh broă mờ hìu tàp pràn să jan ală cau pơgru in. Gơwèt mờ kơnòm bơsram den tiah ơm niam ngan, geh tus 27 cơldŭ ơm geh đèng, dà tơl làm, tiah jă brê, hìu um is. Ai broă lơh sào sa bơh ală kơnòm bơsram dê den jat broă lơh pà priă bơsram kung bè ờs sơl bè tŭ ờ geh kòp. Bơh cau pơgru atbồ ơdŭ den hìu bơsram kung mblàng yal nàng mè bèp kơnòm bơsram in gĭt loh ală bơta mờ iang nùs. Tàm do hìu bơsram ndrờm kơlôi rcang bơh broă sào sa, sền gàr tiah ơm kis, lơh kloh khuẩn, sền gròi pràn kơldang să jan, dilah geh ală bơta gơlik geh den hìu bơsram geh pơgồp bal mờ Hìu sơnơm nàng sền gròi ai ală kơnòm bơsram in.

Ală hìu bơsram tàm Dăk Nông ơm ing broă bơto bơtê tơn tàm hìu bơsram

Tơnơ̆ tŭ sền gŏ kơnòm bơsram bơtờp kòp Covid-19, càr Dăk Nông neh ơm ing broă bơto bơtê mờ bơsram tơn tàm ală hìu bơsram. Sở Giáo dục mờ Đào tạo càr Dăk Nông sồr jơh ală kấp bơsram bơh: kấp dùl, kấp bàr, kấp pe, giáo dục thường xuyên mờ ală hìu bơsram ndai tàm ù tiah gùt càr dê ơm ing broă bơto bơtê tơn tàm hìu bơsram in bơh ngai 07/9 tus di tŭ geh jơnau yal pa. Gơwèt mờ Hìu bơsram Dân tộc nội trú ală kơnhoàl mờ Hìu bơsram kấp pe Dân tộc nội trú N'Trang Lơng, bơyai lơh ai ală kơnòm bơsram ơm wơl tàm hìu bơsram mờ pal atbồ kràñ ngan kơnòm bơsram. Gơwèt mờ Hìu bơsram Chuyên Nguyễn Chí Thanh ai kơnòm bơsram ơm tàm hìu bơsram in rê wơl tàm ală tiah mờ sồr ală kơnòm bơsram lơh jat niam ală broă lơh rcang sơndră kòp jat jơnau sồr.

Sở Giáo dục mờ Đào tạo càr Dăk Nông sồr ală hìu bơsram lơh jat niam ală broă lơh rcang sơndră kòp. Ală hìu bơsram jat ală bơta geh ngan, geh lam lơh ală broă lơh bơto bơtê mờ bơsram online, jàu sră lơh jơnau bơsram, jàu jơnau bơsram bơh ală mpồl tàm internet nàng kờñ dong kơnòm bơsram in sền mờ bơsram bàr pe tơngume di pal. Gah bơto bơtê di tŭ pơgồp bal mờ gah lơh sơnơm bơto pơlam kơnòm bơsram, kuang bàng, cau pơgru lơh niam broă lơh rcang sơndră kòp, gàr niam ờdo ờdă pràn kơl dang să jan ai tơl làm cau pơgru mờ ală kơnòm bơsram in sơr lèt gan dơ̆ kòp do. Ngan là gơwèt mờ kơnòm bơsram F0, geh sền gròi uă rlau tai, pơndờm pơnđiang ală kơnòm in kơ̆ kơljap nùs nhơm lơh jat niam broă lơh rcang sơndră kòp. Ồng Nguyễn Văn Toàn, Kuang atbồ Sở Giáo dục mờ Đào tạo càr Dăk Nông kơ̆p kờñ cau pơgru mờ ală kơnòm bơsram sền gàr niam pràn kơl dang să jan, lơh jat niam ală broă lơh rcang sơndră kòp jat jơnau sồr nàng gờñ rê wơl mờ broă bơto bơtê mờ bơsram sră.  

Tŭ do Sở giáo dục neh hòi điện thoại lùp còp, pơndờm pơnđiang ală cau pơgru in iang nùs ơm wơl tàm hìu bơsram tài bơh să tờm he dê mờ ală kơnòm bơsram. Ală cau pơgru atbồ ơdŭ pal jat sền ngan ală kơnòm bơsram mờ hòi điện thoại ai hìu bơnhă kơnòm bơsram in gĭt ală bơta pràn kơl dang să jan ală kơnòm dê tŭ ơm tàm hìu bơsram, mơkung pơndờm pơnđiang hìu bơnhă kơnòm bơsram dê nàng lời ai oh kòn in ơm wơl tàm do. Sở kung neh sồr kuang đơng lam bồ hìu bơsram pal gròi sền ală kơnòm bơsram pleh mờ bơta tàm bơtờp kòp tàm hìu bơsram.

Gah tàm dơlam Hìu bơsram Dân tộc Nội trú kơnhoàl Dăk R’lấp

Tơnơ̆ tŭ sền gŏ mpồl cau bơtờp mờ virus Sars CoV-2 tàm mpồl bơtiàn bơh dùl nă kơnòm bơsram tàm xã Quảng Tín, kơnhoàl Dăk R’lấp, Phó Chủ tịch UBND càr Dăk Nông mò Tôn Thị Ngọc Hạnh neh kĭ kơrnoat ngui bàr pe broă lơh jal mhar tàm broă rcang sơndră kòp Covid-19 tàm ù tiah do dê. Jat hơ̆, càr Dăk Nông lơh nền wàng se jơh gùt kơnhoàl Dăk R’lấp bơh 12 jiơ klo ngai, ngai 07/9 mờ ngui kràñ ală broă lơh jat Chỉ thị sồ 16 dê.  Mò Võ Thị Kiều Linh, Phó Chủ tịch UBND kơnhoàl Dăk R’lấp đơs, tơnơ̆ tŭ càr ngui Chỉ thị sồ 16, kơnhoàl neh geh gùng dà broă lơh pà phan ngui sa ai làng bol in bơh mpồl gròi sền kòp Covid-19 mpồl bơtiàn. Ală cau tàm mpồl geh phàt phan ngui, phan sa tus tơl hìu bơnhă in, mpồl lơh broă ai ơm yah ngài tàm hơ̆ geh rlau 220 nă cau pơgru, kơnòm bơsram nàng tơl nă cau in iang nùs “cau lơi ơm tềng lơi den ơm mŏ tềng hơ̆”.

Bol añ neh sồr Mpồl đơng lam rcang sơndră kòp bơh xã dê kung bè bơh kơnhoàl dê pal gàr niam ờ lời làng bol lơi gơtìp jơgloh, ờ tơl phan sa pràn, bơkah tàm tơngai kòp. Bol añ ai bơh khà ơn prap rcang lài, dilah làng bol lơi siơ̆u ờ tơl den lài ngan là dong kờl phe mờ bung mi ai ală hìu bơnhă in. Mờ pơn jat tai kờp sền ală hìu bơnhă rƀah, hìu bơnhă gơ lơh bè rƀah, hìu bơnhă chính sách in nàng dong kờl ờ lời làng bol lơi gơtìp jơ gloh.

Mpồl tam klăc cau ùr kơnhoàl Dăk R’lấp neh lam lơh broă lơh “shiper 0 đong” lòt drà dong kờl làng bol, nàng làng bol in iang nùs ơm tàm hìu sơndră kòp. Mpồl neh crơng gơs 110 mpồl lòt drà mờ bơta tus bal bơh mờr 700 nă cau tàm ală thôn, ƀòn, tổ dân phố.  Pah ngai, ală mpồl “Shippe 0 đong” geh dờp sră blơi phan lòt drà dong ală hìu bơnhă. Tŭ jàu phan ală cau tàm mpồl ờ ơm rềp tơn mờ là lời phan tàm mpồng mut ai làng bol in nàng gàr niam jơnau sồr rcang sơndră kòp. Broă lơh do geh Mpồl tam klăc cau ùr kơnhoàl Dăk R’lấp lơh sùm tàm tơngai ai ơm yah ngài mpồl bơtiàn jat Chỉ thị sồ 16.

Jat VOV Tây Nguyên- Cau mblàng K’Hạnh