VOV4.K’ho- Ngai 22/10, Tỉnh ủy Dăk Nông bơyai lơh Pơrjum sền wơl 5 nam lơh jat Nghị quyết Đảng dà lơgar dơ̆ 4 khóa 12, pe nam  lam lơh rơndap broă sồ 5 bơh Tỉnh ủy dê bè sơlơ bơt bơtàu, lơh niam wơl Đảng, kơryan, tơrmù bơta ờ niam nùs nhơm chính trị, niam chài, rài kis, ală tềl tơnggŏ lơh gơlik is, tam gơl is tàm dơlam Đảng. Pơrjum geh lơh pờ tơn tàm internet tus 8 anih pờ tơlik tơn bơh ală kơnhoàl, ƀòn dờng tàm càr.

Lam lơh jat Nghị quyết Đảng dà lơgar dơ̆ 4 khóa 12, Tỉnh ủy Dăk Nông neh ai tơlik rơndap broă sồ 5, lam lơh ngan ngồn ală mpồl kơnòl broă lơh tàm bơta geh ngan bơh càr dê. Ală kấp ủy Đảng gơwèt Tỉnh ủy neh geh 2, 3 broă lơh niam, bơceh pa bè rơwah ală broă tờm, broă ờ suk, broă geh sền gròi uă nàng tơrgùm đơng lam, pơlam, yal tơnggit sền tìs di; pơgồp bal broă lam lơh jat nghị quyết mờ broă lam lơh 2, 3 srơh bè “Cau niam – broă niam”, “Sòl àng ƀòn tờm”, broă lơh “Tơnguh lơh niam hành chính, drơng làng bol”, “bơyai lơh chào kơ mờ pơrjum đảng ờs mờng pah nhai...

Tơngai tus, Thường trực Tỉnh ủy Dăk Nông sồr kấp ủy ală kấp pơn jat tai pơlam lơh jat uă nùs nhơm, jơnau đơs broă lơh bơt bơtàu Đảng, bơt bơtàu broă rơndap lơh, ai tơlik ală broă lơh mùl màl di mờ bơta geh ngan broă gơlik geh, sền gròi tus broă lòt sền, sền sơ wì broă sền tìs di is mờ sền tìs di, lam lơh kơnòl lơh krơh lài mờ broă bơsong bơta ờ niam bơh mpồl cau, cau dùl nă să dê.

Cau mblàng K’Duẩn