VOV4.K’ho- Jơh nùs tơrgùm đơng lam, tă bơsong kòl yan, mìng rlau 1 nhai, càr Dăk Nông neh tơnguh mhar broă tă priă bơcri dà lơgar, geh mờr 70%, jơnhua rlau mờ khà kờp bal bơh gùt lơgar dê. Kờp tus nhai 10, càr Dăk Nông neh tă priă bơcri dà lơgar 1 rbô 500 tơmàn đong, geh mờr 70% priă bơcri geh jàu nam 2021. Bơta pal đơs là pa lài hơ̆ rlau 1 nhai, tàm ngai 25/8, càr tă priă ờ hềt geh 40% sơl. Bơta sơbac mhar tàm broă lam lơh broă lơh, tă priă bơcri ai ală broă lơh bơcri priă bơh kes priă bơh dà lơgar in là kơnờm ală đơng lam kràñ cê bơh kuang đơng lam bồ càr dê.

Kuang đơng lam bồ càr Dăk Nông lòt sền rơndap broă lơh Gia Nghĩa

Ủy ban Nhân dân càr Dăk Nông pà git, tŭ do, càr gam pơn jat tai kờp sền, tam gơl priă bơcri bơh ală rơndap broă geh khà tă priă lơyah ai ală rơndap broă lơh geh jơnau kờñ bơtơl priă bơcri in; gròi sền, tă bơsong kòl yan, chul chồl ală cau tờm bơcri priă, ală tiah tàm tŭ trồ tiah niam ală nhai lồi nam den chồl mhar tĕ tơngai lam lơh broă lơh.

Cau mblàng K’Duẩn