VOV4.K’ho- Tềng đap bơta kòp Covid-19 gam gơlik geh kal ke ngan tàm lơgar Campuchia, Mpồl ling sền gàr tiah nhàr dà lơgar càr Dak Nông mờ ală mpồl lơh broă geh gơnoar neh sơlơ tơnguh ală broă lơh jal mhar, lòt sền, sền gròi tàm tiah nhàr dà lơgar, ờ lời gơlik geh bơta mut tàm lơgar he, dô gan tiah nhàr dà lơgar tìs mờ adat boh lam lơh bơtờp kòp.

Càr Dak Nông geh gùng nhàr dà lơgar jòng 141 kơi sồ rềp nhàr bal mờ càr Mondulkiri, lơgar Campuchia, là tiah neh geh ală cau bơtờp kòp Covid-19 tàm mpồl bơtiàn. Đại tá Phan Quý Vỹ, Phó Chính ủy Gah đơng lam mpồl ling sền gàr tiah nhàr dà lơgar càr Dak Nông pà git, tềng đap broă gơlik geh kal ke bơh kòp Covid-19 dê tàm lơgar Campuchia, digơlan geh cau Việt Nam bơh đah ne tiah nhàr dà lơgar dô gan tiah nhàr rê hờ lơgar nàng pleh kòp. Den tàng, Gah đơng lam mpồl ling sền gàr tiah nhàr dà lơgar càr neh sồr kuang bàng, cau ling 12 pôs ling sền gàr tiah nhàr dà lơgar bañ sền ờ sơp, roh bơta rơcang ngac, sơlơ tơnguh rlau tai broă lơh lòt sền, sền gròi nền nòn tiah mpồng nhàr dà lơgar, gùng dềt, gùng pờ: “Nàng di tŭ rơcang sơndră kòp, Mpồl ling sền gàr tiah nhàr dà lơgar neh ai 25 mpồl sền gròi dùl bă tiah tàm tiah nhàr dà lơgar pơgồp bal mờ mpồl rơcang sơndră kòp sùm lòt sền, sền gròi ală gùng dềt, ală tiah kuơmàng digơlan gơlik geh bơta dô gan tiah nhàr dà lơgar mờ mut tàm lơgar he. Bol hi neh lơh jat nền nòn jơnau sồr bơh kấp hơđang dê, bơh Bộ Quốc phòng mờ Ủy ban Nhân dân càr dê bè broă lơh rơcang sơndră kòp Covid-19, ờ lời cau dô gan tiah nhàr bơh lơgar ndai mut tàm càr. Bal mờ hơ̆ bol hi kung lơh niam broă lơh mblàng yal, hòi jà làng bol lơh jat niam broă rơcang sơndră kòp mờ tus bal srơh git gŏ ală cau tìs kung bè ală broă lơh mut tàm càr, dô gan tiah nhàr dà lơgar tìs mờ adat boh lam nàng di tŭ lơh glài”.

Kuang đơng lam bồ càr Dak Nông lòt sền broă sơlơ sền gròi rơcang sơndră kòp Covid-19 tàm tiah nhàr dà lơgar

Bal mờ broă gàr sùm 100% ling tàm ală pôs ling sền gàr tiah nhàr dà lơgar, Gah đơng lam mpồl ling sền gàr tiah nhàr dà lơgar càr Dak Nông neh sồr Gah đơng lam ling klàng càr ai tai kuang bàng, cau ling gơwèt ală Đại đội ling ù gờl lơh pôs tàm tiah nhàr dà lơgar drơng ai broă lơh rơcang sơndră kòp bơtờp in. Mờ kung sồr ală xã tiah nhàr dà lơgar sơlơ dong kờl Tiểu đội dân quân lơh broă sùm ai ală anih sền gròi rơcang sơndră kòp Covid-19.

Bal mờ mpồl ling, gah lơh sơnơm càr Dak Nông kung neh ai kuang bàng tus tàm ală anih sền gròi tàm tiah nhàr dà lơgar mờ jơnau đơs “rơcang sơndră jơh nùs, git gŏ gơñ, tam cah is mhar, sơm kòp geh cồng nha, bơsong jơh, sơbac mhar gàr niam broă gơlik geh”. Ồng Hà Văn Hùng, Kuang atbồ Sở Y tế càr Dak Nông pà git, tŭ do geh 100 nă y bác sĩ tàm pơ dờn gơp ơm sền gròi bal mờ kuang bàng, cau ling rơcang sơndră kòp mut tàm càr. Jơh ală cau lòt rê tàm tiah nhàr dà lơgar tŭ gơtìp git gŏ ndrờm geh mpồl lơh broă geh gơnoar jun lòt tam cah is jat di jơnau sồr: “Càr Dak Nông tŭ do kung ờ hềt geh cau lơi bơtờp kòp, mơya bol hi ờ sền ờ sơp, ală mpồl kung sỳm lòt sền, lam lơh ală broă lơh rơcang sơndră kòp dùl bă nền nòn. Gah lơh sơnơm neh pơgồp bal mờ ală sở, mpồl, gah broă lơh lam lơh nền nòn, tơrgùm kơryan bota digơlan ală cau bơh lơgar Campuchia rê mut tàm càr. Tŭ do geh mờr 200 nă cau geh gah lơh sơnơm mờ mpồl ling sền gàr tiah nhàr dà lơgar sùm ơm gak, sền gròi ngai mang tàm ală anih sền gròi, ờ ai cau lơi in mut tàm càr gan tiah nhàr dà lơgar. Mpồl mờng chài kỹ thuật, bol hi ai tàm ală tiah, pơn yơu ală anih sền gròi tàm kơnhoàl Cư Jut den geh ai mpồl lơh sơnơm tàm Cư Jut, ai dilạh tàm kơnhoàl Dak Mil den ai mpồl lơh sơnơm tàm Dak Mil, ai tàm 2 mpồng nhàr dà lơgar bol hi sồr mpồl lơh broă bơh Tiah tờm sền gròi kòp tê jê să càr tus dong kờl”.

Mpồl ling sền gàr tiah nhàr dà lơgar càr Dak Nông sền gròi tàm ală gùng dềt, gùng pờ tàm tiah nhàr dà lơgar

Lài hơ̆, Dak Nông neh geh sră nggal đơng lam ală sở, mpồl, gah broă lơh, ală mpồl cau, ală mpồl ling, ală tiah bañ sền ờ sơp tàm broă rơcang sơndră kòp bơtờp; tơrmù ƀà ală broă lơh tơrgùm gal cau ờ kuơmàng. Mờ kung pal lơh jat nền nòn ală broă lơh gàr ờdo ờdă, lơh jat jơnau sồr pơn chèu glòm muh mat, lơh kloh khuẩn... di mờ jơnau sồr. Ală mpồl lơh broă geh gơnoar sền gròi nền nòn broă mut tàm càr, tam cah is, sền gròi pràn kơldang să jan, mờ kung rơcang ală bơta kuơmàng rơcang rề ơnàng mpồl cau mut tàm càr di mờ broă gơlik geh bơh kòp bơtờp jat nùs nhơm bơtàu tơnguh mơya pal gàr ờdo ờdă.

Cau mblàng K’Duẩn